જમ્મુ-કાશ્મીરમાં કુદરતી આફત: કિશ્તવાડમાં વાદળ ફાટવાથી 17 લોકોના મોત, રાજૌરીમાં પૂરની ચેતવણી
છેલ્લું અપડેટ : 14 Aug 2025
જમ્મુ-કાશ્મીરમાં ભારે વરસાદ અને કુદરતી આફતોએ ભારે તબાહી મચાવી છે. કિશ્તવાડ જિલ્લાના ચશોટી વિસ્તારમાં 14 ઓગસ્ટ, 2025ના રોજ વહેલી સવારે વાદળ ફાટવાની ઘટના બની, જે મચ્છાઈલ માતા યાત્રાના પ્રારંભિક સ્થળે થઈ હતી. આ ઘટનાએ ભારે વિનાશની આશંકા ઊભી કરી છે, જેમાં અનેક ઘરો ધ્વસ્ત થયા અને લોકો ગુમ થયા હોવાના અહેવાલ છે. ડેપ્યુટી કમિશનર પંકજ શર્માએ જણાવ્યું કે, બચાવ કામગીરી શરૂ કરવામાં આવી છે, પરંતુ નુકસાનનો આંકડો હજુ સ્પષ્ટ નથી.
આ ઉપરાંત, રાજૌરી અને પૂંચ જિલ્લાઓમાં ભારે વરસાદે પૂરની સ્થિતિ સર્જી છે. જમ્મુ-રાજૌરી હાઇવે (NH-144A) પર ભૂસ્ખલનને કારણે રસ્તો બંધ થયો, જેનાથી સેંકડો વાહનો ફસાયા. રિયાસી જિલ્લામાં પણ ભારે વરસાદે સલાલ ડેમના દરવાજા ખોલવાની ફરજ પડી, જેનાથી રસ્તાઓ બંધ થયા. વહીવટીતંત્રે શાળાઓ બંધ કરી અને એલર્ટ જાહેર કર્યું છે.
ઘટનાની માહિતી મળ્યા બાદ, મોદી સરકારમાં મંત્રી જિતેન્દ્ર સિંહે સ્થાનિક અધિકારીઓ સાથે વાત કરી અને ઘટનાની માહિતી મેળવી. તેમણે જણાવ્યું કે વહીવટીતંત્રે સ્થળ પર રાહત કાર્ય માટે કાર્યવાહી શરૂ કરી દીધી છે.
કેન્દ્રીય મંત્રી જિતેન્દ્ર સિંહે સોશિયલ મીડિયા પોસ્ટમાં જણાવ્યું હતું કે, "જમ્મુ અને કાશ્મીરના વિરોધી પક્ષ અને સ્થાનિક ધારાસભ્ય સુનીલ કુમાર શર્મા પાસેથી માહિતી મળ્યા બાદ, મેં કિશ્તવાડના ડેપ્યુટી કમિશનર પંકજ કુમાર શર્મા સાથે વાત કરી. ચોસિટી વિસ્તારમાં વાદળ ફાટવાથી ભારે જાનહાનિ થવાની સંભાવના છે. વહીવટીતંત્ર તાત્કાલિક કાર્યવાહીમાં લાગી ગયું છે અને બચાવ ટીમ ઘટનાસ્થળે રવાના થઈ ગઈ છે."
કેન્દ્રીય મંત્રીએ વધુમાં લખ્યું છે કે નુકસાનનું મૂલ્યાંકન કરવામાં આવી રહ્યું છે અને જરૂરી બચાવ અને તબીબી વ્યવસ્થાપન વ્યવસ્થા કરવામાં આવી રહી છે. મારી ઓફિસ નિયમિત અપડેટ મેળવી રહી છે અને શક્ય તેટલી બધી મદદ પૂરી પાડવામાં આવી રહી છે.
ભારે નુકસાન થવાની સંભાવના
કિશ્તવાડમાં અચાનક પૂર અંગે, જમ્મુ અને કાશ્મીરના વિરોધ પક્ષના નેતા અને પદ્દાર-નાગસેનીના ધારાસભ્ય સુનીલ કુમાર શર્માએ જણાવ્યું હતું કે, "અમારી પાસે હજુ સુધી કોઈ આંકડા કે ડેટા નથી, પરંતુ ત્યાં ભારે નુકસાન થવાની સંભાવના છે. ચાલુ યાત્રાને કારણે આ વિસ્તારમાં ભીડ છે. હું લેફ્ટનન્ટ ગવર્નર સાથે વાત કરીશ અને બચાવ કામગીરી માટે NDRF ટીમની મદદ લઈશ."
આ વાદળ ફાટવાની ઘટના યાત્રા માર્ગ પર બની છે અને અધિકારીઓએ હજુ સુધી જાનહાનિના ચોક્કસ આંકડાની પુષ્ટિ કરી નથી. પ્રારંભિક અહેવાલો દર્શાવે છે કે જાનમાલનું ભારે નુકસાન થયું છે.
