VIDEO: ‘મને હટાવી પોતે મંત્રી બનવા માંગે છે’, BJPના એક નેતાનો બીજા નેતા પર મોટો આરોપ
છેલ્લું અપડેટ : 29 Aug 2026
ઓડિશાની રાજનીતિમાં ભારતીય જનતા પાર્ટી (BJP)ને લઈને આંતરિક ખેંચતાણના અહેવાલો વચ્ચે કેન્દ્રીય આદિજાતિ બાબતોના મંત્રી જ્યુઅલ ઓરામ (Jual Oram)ના એક નિવેદને રાજકીય ગરમાવો વધારી દીધો છે. ઓરામે પોતાની જ પાર્ટીના કેટલાક નેતાઓ પર તેમને કેન્દ્રીય મંત્રીમંડળ (Union Cabinet)માંથી હટાવવાનું અને તેમની રાજકીય છબી ખરાબ કરવાનું કાવતરું ઘડવાનો ગંભીર આરોપ લગાવ્યો છે.
સહયોગીની ધરપકડ બાદ શરૂ થયો વિવાદ
આ સમગ્ર વિવાદ તેમના નજીકના સહયોગી રાકેશ પાસવાનની ધરપકડ બાદ શરૂ થયો હતો. ઓડિશાના રાઉરકેલામાં સંગઠિત ગુનાના (Organised Crime) એક કેસમાં સંડોવણીના આરોપસર પોલીસે રાકેશ પાસવાનને કસ્ટડીમાં લીધો હતો. આરોપ છે કે પાસવાને સરકારી ગેસ્ટ હાઉસમાં કેટલાક આરોપીઓને આશરો આપ્યો હતો. જોકે, રાકેશ પાસવાને આ આરોપોને સંપૂર્ણપણે નકારી કાઢ્યા છે.
આ મામલે જ્યુઅલ ઓરામે અગાઉ કાયદાને પોતાનું કામ કરવા દેવાની વાત કરી હતી. તેમણે કહ્યું હતું કે કાયદાકીય કાર્યવાહી સામે તેમને કોઈ વાંધો નથી. પરંતુ ત્યારબાદ તેમણે પોતાની જ પાર્ટીના કેટલાક નેતાઓ સામે ગંભીર આક્ષેપો કર્યા હતા.
‘મને હટાવીને પોતે મંત્રી બનવા માંગે છે’
સુંદરગઢ લોકસભા બેઠક પરથી છ વખત સાંસદ રહી ચૂકેલા ઓરામે આરોપ લગાવ્યો કે ભાજપના કેટલાક નેતાઓ તેમને બદનામ કરવા માટે પૈસા પાણીની જેમ ખર્ચી રહ્યા છે. તેમના કહેવા પ્રમાણે, કેટલાક લોકો એવું માની રહ્યા છે કે જો તેમને કેન્દ્રીય મંત્રીમંડળમાંથી દૂર કરવામાં આવશે તો મંત્રી બનવાની તક તેમને મળી શકે છે.
ઓરામે વધુમાં જણાવ્યું કે આ સમગ્ર ઘટનાક્રમને કારણે તેમણે પોતાનો નિર્ણય પણ બદલી નાખ્યો છે. અગાઉ તેઓ આગામી લોકસભા ચૂંટણી (Lok Sabha Election) ન લડવાનો વિચાર કરી રહ્યા હતા, પરંતુ હવે તેઓ 2029ની લોકસભા ચૂંટણી ચોક્કસ લડશે અને પોતાના વિરોધીઓનો સામનો કરશે.
‘કાવતરું કરનારાઓ સુધી પહોંચીશ’
ઓરામે કહ્યું કે તેઓ આ સમગ્ર દુષ્પ્રચાર (Propaganda) પાછળ કોણ છે તેની તપાસ કરશે. તેમણે આ અંગે ઓડિશા ભાજપના સંગઠન મહામંત્રીને પણ ફરિયાદ કરી હોવાનું જણાવ્યું હતું.
જોકે, આ દરમિયાન ઓરામના એક કડક નિવેદને નવો વિવાદ ઊભો કર્યો છે. તેમણે વિરોધીઓ સામે આક્રમક ભાષાનો ઉપયોગ કરતા કહ્યું કે તેમને બદનામ કરનારાઓ સામે કડક કાર્યવાહી કરવાની અને તેમના ‘હાથ કાપવાની’ તાકાત હોવાનો દાવો કર્યો.
વિરોધ પક્ષોએ ભાજપને ઘેર્યું
કેન્દ્રીય મંત્રીના આ નિવેદન બાદ બીજુ જનતા દળ (BJD) અને કોંગ્રેસે ભાજપ પર નિશાન સાધ્યું છે. BJD નેતા પ્રમિલા મલિકે કહ્યું કે ઓરામ જેવા વરિષ્ઠ આદિવાસી નેતાનું નિવેદન ભાજપની આંતરિક જૂથબાજી (Factionalism)ની સ્થિતિ દર્શાવે છે.
બીજી તરફ, ઓડિશા કોંગ્રેસ અધ્યક્ષ ભક્ત ચરણ દાસે ઓરામની ભાષાને કડક અને અસંસદીય ગણાવી હતી. તેમણે કહ્યું કે લોકશાહીમાં હિંસક ભાષા માટે કોઈ સ્થાન નથી. હવે ઓરામના આ આરોપો અને નિવેદનને લઈને ઓડિશા ભાજપની આંતરિક રાજનીતિ વધુ ચર્ચામાં આવી છે.