લાલ કિલ્લામાં થઈ મોટી ચોરી, શંકાસ્પદ વ્યક્તિ ઉઠાવી ગયો સોનું અને હીરા જડિત કળશ
છેલ્લું અપડેટ : 06 Sept 2025
દિલ્હીના લાલ કિલ્લા પરિસરમાં બુધવારે (3 સપ્ટેમ્બર) આયોજિત ધાર્મિક સમારોહમાંથી લગભગ 1 કરોડ રૂપિયાની કિંમતનો સોનું અને હીરા જડિત કળશ ચોરાઈ ગયો હતો. આ ઘટનાથી ત્યાં હાજર લોકોમાં ચકચાર મચી ગયો હતો. પીડિત ઉદ્યોગપતિ સુધીર જૈને કોતવાલી પોલીસ સ્ટેશનમમાં આ અંગે ફરિયાદ દાખલ કરાવી છે. ફરિયાદના આધારે પોલીસે શંકાસ્પદની ઓળખ કરી લીધી છે અને જલ્દી જ તેને ઝડપી લેવાની વાત કહી હતી.
શું હતી ઘટના?
મળતી માહિતી મુજબ, લાલ કિલ્લા પરિસરમાં 15 ઓગસ્ટ પાર્કમાં 28 ઓગસ્ટથી જૈન ધર્મ સાથે સંબંધિત ધાર્મિક વિધિ ચાલી રહી છે, જે 9 સપ્ટેમ્બર સુધી ચાલુ રહેશે. આ માટે એક ખાસ સ્ટેજ તૈયાર કરવામાં આવ્યો હતો, જ્યાં ફક્ત ધોતી-કુર્તા પહેરેલા અને પરવાનગી ધરાવતા લોકોને જ બેસવાની મંજૂરી હતી. સિવિલ લાઇન્સના રહેવાસી ઉદ્યોગપતિ સુધીર જૈન દરરોજ પૂજા માટે પોતાના ઘરેથી એક કિંમતી કળશ લાવતા હતા. પોલીસના જણાવ્યા અનુસાર, આ કળશ 760 ગ્રામ સોનાથી બનેલો છે અને 150 ગ્રામ હીરા, માણેક અને નીલમણિથી શણગારેલો છે.
ઓમ બિરલાના સ્વાગતમાં વ્યસ્ત થયા લોકો
પોલીસ અધિકારીઓએ જણાવ્યું હતું કે, મંગળવારે પણ સુધીર જૈન પૂજા માટે કળશ લઈને પહોંચ્યા હતા. કળશને પૂજા સ્થળ પર મૂકવામાં આવ્યો હતો અને ભક્તો તેની આસપાસ બેઠા હતા. આ દરમિયાન, પૂર્વનિર્ધારિત કાર્યક્રમ મુજબ, લોકસભાના અધ્યક્ષ ઓમ બિરલા પણ ધાર્મિક વિધિમાં ભાગ લેવા પહોંચ્યા હતા. કાર્યક્રમના આયોજકો અને અન્ય લોકો તેમનું સ્વાગત કરવામાં વ્યસ્ત થઈ ગયા. આ દરમિયાન, સ્ટેજ પર હાજર લોકોનું ધ્યાન કળશ પરથી હટ્યું. થોડા સમય પછી, જ્યારે કળશ તરફ લોકોનું ધ્યાન ગયું તો તે ત્યાં હાજર નહતો. શરૂઆતમાં એવું માનવામાં આવતું હતું કે તે ક્યાંક દફનાવવામાં આવ્યો હશે, પરંતુ ઓમ બિરલા ગયા પછી જ્યારે શોધ શરૂ થઈ, ત્યારે ખબર પડી કે કળશ ચોરાઈ ગયો છે.
CCTV ફૂટેજમાં શું જોયું?
કોતવાલી પોલીસે આ અંગે તપાસ હાથ ધરી છે. તપાસમાં જાણવા મળ્યું કે, એક શંકાસ્પદ વ્યક્તિ ઘણા દિવસોથી ધોતી-કુર્તા પહેરીને સ્થળ પર ફરતો હતો. તે આયોજકો અને ભક્તો સાથે ભળી ગયો અને પરિસ્થિતિનો લાભ લઈને સ્ટેજ પર પહોંચ્યો. ઓમ બિરલાના આગમનના સમાચાર મળતાં જ અફરા-તફરી થઈ ગઈ હતી અને ભીડ પાછી ફરે તે પહેલાં તેણે કળશ છુપાવી દીધો અને ભાગી ગયો. પોલીસને ઘટના સ્થળના કેટલાક CCTV ફૂટેજ મળ્યા છે, જેમાં શંકાસ્પદ વ્યક્તિની ગતિવિધિઓ રેકોર્ડ કરવામાં આવી છે.