VIDEO: "અંગ્રેજી ન સમજાયું એટલે તમારી માતૃભાષામાં લખ્યું!", વિદ્યાર્થી વિરોધ વચ્ચે રાહુલ ગાંધીને તેલંગાણા ભાજપ પ્રમુખનો આકરો કટાક્ષ
છેલ્લું અપડેટ : 09 Sept 2026
તેલંગાણામાં વિદ્યાર્થીઓની ફી રિઇમ્બર્સમેન્ટ (ફી ભરપાઈ) મુદ્દે ચાલી રહેલા વિરોધ વચ્ચે એક અનોખો રાજકીય વિવાદ સામે આવ્યો છે. તેલંગાણા ભાજપ પ્રદેશ પ્રમુખ એન. રામચંદર રાવે લોકસભાના વિપક્ષી નેતા રાહુલ ગાંધીને ઇટાલિયન ભાષામાં પત્ર લખીને આકરો કટાક્ષ કર્યો છે. ભાજપ અધ્યક્ષે કટાક્ષ કરતા જણાવ્યું કે અગાઉ અંગ્રેજીમાં લખેલા પત્રો કદાચ રાહુલ ગાંધીને સમજાયા ન હોવાથી તેમણે આ વખતે તેમની "માતૃભાષા"માં પત્ર લખ્યો છે.
10 દિવસમાં 4 વખત ધરપકડ, વિદ્યાર્થીઓ પર લાઠીચાર્જ
રાજ્યમાં ચાલી રહેલા આંદોલન અંગે માહિતી આપતાં એન. રામચંદર રાવે જણાવ્યું કે, "વિદ્યાર્થીઓની ફી ભરપાઈના મુદ્દે ભાજપ છેલ્લા 10 દિવસથી આંદોલન કરી રહ્યું છે. આ 10 દિવસ દરમિયાન મારી 4 વખત ધરપકડ કરવામાં આવી છે. આંદોલન કરી રહેલા વિદ્યાર્થીઓ પર લાઠીચાર્જ કરવામાં આવ્યો, જેમાં અનેક વિદ્યાર્થીઓ અને ભાજપના કાર્યકરો ગંભીર રીતે ઇજાગ્રસ્ત થયા છે અને તેમને હોસ્પિટલમાં દાખલ કરવા પડ્યા છે."
તેમણે આરોપ લગાવ્યો કે રાજ્ય સરકારને વિદ્યાર્થીઓના ભવિષ્યની કોઈ ચિંતા નથી અને રાજ્યમાં વિદ્યાર્થીઓનું શિક્ષણ જોખમમાં મુકાઈ ગયું છે.
પેન્ડિંગ રકમ ₹5,000 કરોડથી વધીને ₹10,000 કરોડે પહોંચી
કોંગ્રેસ પક્ષ પર પ્રહાર કરતાં ભાજપ પ્રદેશ પ્રમુખે કહ્યું કે, "ચૂંટણી દરમિયાન કોંગ્રેસે વચન આપ્યું હતું કે તેઓ સત્તામાં આવશે તો વિદ્યાર્થીઓની ફી રિઇમ્બર્સમેન્ટ પૂર્ણ કરશે. અગાઉની BRS સરકાર આમાં નિષ્ફળ રહી હતી અને તે સમયે આશરે ₹5,000 કરોડ પેન્ડિંગ હતા. છેલ્લા 3 વર્ષમાં આ પેન્ડિંગ રકમ વધીને હવે ₹10,000 કરોડ થઈ ગઈ છે."
રાહુલ ગાંધીને કેમ ઇટાલિયન ભાષામાં પત્ર લખ્યો?
રાહુલ ગાંધી પર સીધો નિશાન સાધતા રામચંદર રાવે જણાવ્યું કે, "રાહુલ ગાંધી આખા દેશમાં ફરીને વિદ્યાર્થીઓને ગેરમાર્ગે દોરવાનું અને મૂર્ખ બનાવવાનું બંધ કરે અને તેના બદલે પોતાના રાજ્યના મુખ્યમંત્રીને યોગ્ય સલાહ આપે. મેં રાહુલ ગાંધીને અગાઉ અંગ્રેજીમાં પત્રો લખ્યા હતા, પરંતુ કદાચ તેઓ તે સમજી શક્યા નહીં. તેથી મેં આ વખતે તેમની પોતાની માતૃભાષા (ઇટાલિયન)માં પત્ર લખ્યો છે. તેઓ આ પત્ર વાંચે અને પોતાના મુખ્યમંત્રીને સલાહ આપીને તેલંગાણાના વિદ્યાર્થીઓને ન્યાય અપાવે."
