CDS અનિલ ચૌહાણનો કાર્યકાળ આઠ મહિના લંબાવાયો, આ તારીખ સુધી સંભાળશે હોદ્દો

કેન્દ્ર સરકારે દેશના ચીફ ઓફ ડિફેન્સ સ્ટાફ (CDS) જનરલ અનિલ ચૌહાણનો કાર્યકાળ આઠ મહિના માટે લંબાવ્યો છે. તેઓ હવે 30 મે, 2026 સુધી આ પદ પર રહેશે. કેન્દ્ર સરકારે 24 સપ્ટેમ્બર, 2025 ના રોજ આ આદેશ જારી કર્યો હતો.

વડાપ્રધાનની અધ્યક્ષતામાં કેબિનેટની અપોઈન્ટમેન્ટ કમિટી (ACC) એ આ નિર્ણયને મંજૂરી આપી હતી. જનરલ ચૌહાણ સંરક્ષણ મંત્રાલય હેઠળ આવતા ડિપાર્ટમેન્ટ ઓફ મિલિટરી અફેર્સ (DMA) ના સચિવ તરીકે પણ સેવા આપવાનું ચાલુ રાખશે.

જનરલ અનિલ ચૌહાણ કોણ છે?

જનરલ અનિલ ચૌહાણને 28 સપ્ટેમ્બર, 2022 ના રોજ CDS તરીકે નિયુક્ત કરવામાં આવ્યા હતા. 1961 માં જન્મેલા ચૌહાણે નેશનલ ડિફેન્સ એકેડમી, ખડકવાસલા અને ઇન્ડિયન મિલિટરી એકેડેમી, દેહરાદૂનમાંથી લશ્કરી શિક્ષણ મેળવ્યું હતું.

તેમને વિશિષ્ટ સેવા માટે અનેક લશ્કરી સન્માનો પ્રાપ્ત થયા છે. આમાં પરમ વિશિષ્ટ સેવા મેડલ, ઉત્તમ યુદ્ધ સેવા મેડલ, અતિ વિશિષ્ટ સેવા મેડલ, સેના મેડલ અને વિશિષ્ટ સેવા મેડલનો સમાવેશ થાય છે.

આ સાથે, જનરલ ચૌહાણ 2026 સુધી ભારતીય સશસ્ત્ર દળોની ત્રણેય શાખાઓ - સેના, નૌકાદળ અને વાયુસેના માટે CDS  અને સરકારના મુખ્ય લશ્કરી સલાહકાર તરીકે સેવા આપવાનું ચાલુ રાખશે.