મોટા સમાચાર / નવા શૈક્ષણિક વર્ષથી બદલાશે ધોરણ-3થી ધોરણ-6ના પાઠ્યપુસ્તકો અને અભ્યાસક્રમ

નેશનલ કાઉન્સિલ ઓફ એજ્યુકેશનલ રિસર્ચ એન્ડ ટ્રેનિંગ NCERT 1 એપ્રિલથી શરૂ થતા શૈક્ષણિક વર્ષ 2024-25 માટે ધોરણ-3 થી 6 સુધીનો નવો અભ્યાસક્રમ અને પાઠ્યપુસ્તકો બહાર પાડશે. અન્ય વર્ગોના અભ્યાસક્રમ અને પાઠ્યપુસ્તકોમાં કોઈ ફેરફાર કરવામાં આવશે નહીં. CBSE અધિકારીઓએ આ જાણકારી આપી.

સેન્ટ્રલ બોર્ડ ઓફ સેકન્ડરી એજ્યુકેશન-CBSE એ સંલગ્ન શાળાઓને મોકલેલા પત્રમાં જણાવ્યું હતું કે NCERTએ તેને જાણ કરી છે કે ધોરણ-3થી 6 માટે નવા અભ્યાસક્રમ અને પાઠયપુસ્તકો પર કામ કરવામાં આવી રહ્યું છે અને ટૂંક સમયમાં જ તેને બહાર પાડવામાં આવશે.

CBSEના નિયામક (શૈક્ષણિક) જોસેફ એમેન્યુઅલે જણાવ્યું હતું કે, "શાળાઓને સલાહ આપવામાં આવે છે કે તેઓ વર્ષ 2023 સુધીમાં NCERT દ્વારા પ્રકાશિત પાઠયપુસ્તકોની જગ્યાએ આ નવા અભ્યાસક્રમ અને ધોરણ-3 થી 6 માટે નવા પાઠયપુસ્તકો અપનાવે."

તેમણે પત્રમાં જણાવ્યું હતું કે, "ધોરણ VI માટે બ્રિજ કોર્સ અને ધોરણ-3 માટે સંક્ષિપ્ત માર્ગદર્શિકા NCERT દ્વારા તૈયાર કરવામાં આવી રહી છે જેથી વિદ્યાર્થીઓ નવી શૈક્ષણિક સિસ્ટમ અને નવા અભ્યાસક્રમ માળખા, 2023 અનુસાર સરળતાથી અભ્યાસ કરી શકે. NCERT પાસેથી સામગ્રી પ્રાપ્ત કર્યા પછી, તે તમામ શાળાઓને ઓનલાઈન મોકલવામાં આવશે.

CBSE શાળાના વડાઓ અને શિક્ષકો માટે ક્ષમતા નિર્માણ કાર્યક્રમોનું પણ આયોજન કરશે જેથી તેઓને રાષ્ટ્રીય શિક્ષણ નીતિ (NEP)-2020માં પરિકલ્પના મુજબ શિક્ષણની નવી રીતો શીખવાના અભિગમથી વાકેફ કરવામાં આવે.

શિક્ષણ મંત્રાલયે 18 વર્ષ પછી નેશનલ કરિક્યુલમ ફ્રેમવર્ક (NCF) માં સુધારો કરીને ગયા વર્ષે ફેરફારોની સૂચના આપી હતી. NCFમાં 1975, 1988, 2000 અને 2005માં ચાર વખત સુધારો કરવામાં આવ્યો છે.

NCERT રાષ્ટ્રીય શિક્ષણ નીતિ-2020 ના અમલીકરણ હેઠળ શાળા શિક્ષણ માટેના નવા રાષ્ટ્રીય અભ્યાસક્રમ ફ્રેમવર્ક-2023ને અનુરૂપ શાળાઓ માટે નવા પાઠ્યપુસ્તકો તૈયાર કરવાની પ્રક્રિયામાં છે.

1 એપ્રિલ, 2024 થી શરૂ થતા શૈક્ષણિક વર્ષ 2024-25 માટે અન્ય વર્ગોના અભ્યાસક્રમ અને પાઠયપુસ્તકોમાં કોઈ ફેરફાર કરવામાં આવશે નહીં

વર્ષ 2022માં, NCERT એ COVID-19 રોગચાળાને પગલે વિદ્યાર્થીઓ પર પાઠ્યપુસ્તકનું ભારણ  ઘટાડવા માટે ધોરણ-6 થી 12 સુધીના અભ્યાસક્રમને તર્કસંગત બનાવ્યો હતો.

ગયા વર્ષે પ્રકાશિત થયેલા નવા પાઠ્યપુસ્તકોમાં શેડ્યૂલ કરાયેલા ફેરફારો પૈકી, NCERTએ મુઘલ શાસકો, 2002ના ગુજરાત રમખાણો, શીત યુદ્ધ અને કટોકટી અને સામયિક કોષ્ટક પરના પ્રકરણો દૂર કર્યા હતા.