અનિલ અંબાણીના પુત્ર વિરુદ્ધ CBIએ નોંધ્યો કેસ, 228 કરોડની છેતરપિંડીની છે ઘટના
સેન્ટ્રલ બ્યુરો ઓફ ઇન્વેસ્ટિગેશન (CBI)એ બિઝનેસમેન અનિલ અંબાણીના પુત્ર જય અનમોલ અંબાણી સામે કથિત
સેન્ટ્રલ બ્યુરો ઓફ ઇન્વેસ્ટિગેશન (CBI)એ બિઝનેસમેન અનિલ અંબાણીના પુત્ર જય અનમોલ અંબાણી સામે કથિત છેતરપિંડીનો કેસ નોંધ્યો છે. આ કેસ યુનિયન બેન્ક ઓફ ઇન્ડિયા સાથે 228.06 કરોડ રૂપિયાની કથિત છેતરપિંડી સાથે સંબંધિત છે. અહેવાલો અનુસાર, બેન્ક દ્વારા દાખલ કરવામાં આવેલી ફરિયાદના આધારે આ કાર્યવાહી કરવામાં આવી હતી. ફરિયાદમાં આરોપ મૂકવામાં આવ્યો છે કે જય અનમોલ અંબાણીએ તેમની એક ગ્રુપ કંપની દ્વારા બેન્ક પાસેથી લોન લીધી હતી અને ત્યારબાદ લોન ચૂકવવામાં નિષ્ફળ ગયા હતા, જેના કારણે બેન્કને ભારે નાણાકીય નુકસાન થયું હતું. CBI હવે આ મામલાની વધુ તપાસ કરી રહી છે, જેમાં ફન્ડના ઉપયોગ અને કથિત નાણાકીય અનિયમિતતાઓની તપાસનો સમાવેશ થશે.
450 કરોડ રૂપિયાની ક્રેડિટ સુવિધા કેસ
બેન્કની ફરિયાદ અનુસાર, RHFLએ તેની વ્યવસાયિક જરૂરિયાતોને પૂર્ણ કરવા માટે મુંબઈમાં બેન્કની SCF શાખા પાસેથી 450 કરોડ રૂપિયાની ક્રેડિટ લિમિટ લીધી હતી. ક્રેડિટ સુવિધા આપતી વખતે, બેન્કે RHFL પર ઘણી શરતો લાદી હતી, જેમાં નાણાકીય શિસ્ત જાળવવી, હપ્તાઓ, વ્યાજ અને અન્ય શુલ્કની સમયસર ચુકવણી કરવી અને તમામ વેચાણની રકમ બેન્ક ખાતા દ્વારા રૂટ કરવી શામેલ છે.
કંપની સમયસર હપ્તા ચૂકવવામાં નિષ્ફળ ગઈ, જેના કારણે 30મી સપ્ટેમ્બર 2019ના રોજ ખાતાને નોન-પર્ફોર્મિંગ એસેટ (NPA) જાહેર કરવામાં આવ્યું. બેન્કની ફરિયાદના આધારે, ગ્રાન્ટ થોર્ન્ટન દ્વારા પહેલી એપ્રિલ 2016થી 30મી જૂન 2019ના સમયગાળા માટે ફોરેન્સિક ઓડિટ હાથ ધરવામાં આવ્યું. તપાસમાં જાણવા મળ્યું કે ઉધાર લીધેલા ભંડોળનો દુરુપયોગ કરવામાં આવ્યો હતો. ભંડોળને ડાયવર્ટ કરવામાં આવ્યું હતું અને મૂળ વ્યવસાયિક હેતુ સિવાય અન્ય હેતુઓ માટે ખર્ચવામાં આવ્યું હતું.
બેન્કે આરોપ લગાવ્યો છે કે આરોપીઓ જેઓ કંપનીના પૂર્વ પ્રમોટરો/ડિરેક્ટરો હતા, તેમણે ખાતાઓમાં હેરાફેરી કરી અને છેતરપિંડીથી ભંડોળનો દુરુપયોગ કર્યો. તેણે બેન્કના નાણાંનો દુરુપયોગ કર્યો અને ભંડોળને અન્ય હેતુઓ માટે વાળ્યું, જેના પરિણામે બેન્કને 228 કરોડ રૂપિયાનું નુકસાન થયું. સીબીઆઈએ હવે આ મામલાની વિગતવાર તપાસ શરૂ કરી છે.
