નંદીગ્રામમાં ભાજપનો ઐતિહાસિક સપાટો! 1.22 લાખથી વધુ મતોના તોતિંગ માર્જિન સાથે તૂટ્યો 1967 પછીનો જૂનો રેકોર્ડ!
છેલ્લું અપડેટ : 09 Oct 2026
પશ્ચિમ બંગાળના પૂર્વ મેદિનીપુર જિલ્લાની હાઈપ્રોફાઈલ નંદીગ્રામ વિધાનસભા બેઠકની પેટાચૂંટણીમાં ભાજપના ઉમેદવાર હસીરાની રથે ઐતિહાસિક વિજય નોંધાવ્યો છે. તેમણે 1,22,753 મતોના જંગી અંતરથી જીત મેળવીને વર્ષ 2016નો જૂનો રેકોર્ડ તોડી નાખ્યો છે.
ભાજપને 75%થી વધુ વોટ મળ્યા
ચૂંટણી પરિણામો મુજબ, ભાજપના હસીરાની રથને કુલ 1,64,427 મત મળ્યા હતા, જે કુલ પડેલા મતોના 75.94% જેટલા છે. જ્યારે બીજા સ્થાને રહેલા કોંગ્રેસના ઉમેદવાર મિલન પ્રધાનને માત્ર 41,674 મત મળ્યા હતા. અન્ય પક્ષોમાં CPI ત્રીજા, AISF ચોથા અને ડેમોક્રેટિક ટીએમસી પાંચમા ક્રમે રહ્યા હતા.
1967 પછીની સૌથી મોટી ઐતિહાસિક જીત
નંદીગ્રામ બેઠક પર 1967 પછી કોઈપણ ઉમેદવાર માટે જીતનું આ સૌથી મોટું અંતર છે. અગાઉ આ રેકોર્ડ શુભેન્દુ અધિકારીના નામે હતો, જેમણે વર્ષ 2016માં ટીએમસી તરફથી લડતાં 81,230 મતોથી જીત મેળવી હતી. આ વખતે ભાજપના ઉમેદવારે એ જૂનો રેકોર્ડ પણ પાર કરી લીધો છે.
પેટાચૂંટણી કેમ યોજવી પડી?
વિધાનસભા ચૂંટણીમાં મુખ્યમંત્રી શુભેન્દુ અધિકારીએ ભવાનીપુર બેઠક પરથી મમતા બેનર્જીને 15,000થી વધુ મતોથી હરાવ્યા હતા. ત્યારબાદ તેમણે ભવાનીપુર બેઠક પોતાની પાસે રાખીને નંદીગ્રામ બેઠક છોડતાં અહીં પેટાચૂંટણી યોજાઈ હતી. ટીએમસીના ઉમેદવારે ફોર્મ પાછું ખેંચી લેતાં મમતા બેનર્જીએ આ ચૂંટણીમાં કોંગ્રેસને સમર્થન આપ્યું હતું.
કોણ છે હસીરાની રથ?
વિજયી બનેલા હસીરાની રથ મુખ્યમંત્રી શુભેન્દુ અધિકારીના ભૂતપૂર્વ અંગત મદદનીશ (PA) ચંદ્રનાથ રથના માતા છે. ચંદ્રનાથ રથની ગત 6 મેના રોજ ઉત્તર 24 પરગણાના મધ્યમગ્રામમાં હત્યા કરી દેવામાં આવી હતી.
