VIDEO: ચોમાસુ સત્રમાં ગાજશે અયોધ્યા રામ મંદિર દાન ચોરીનો મુદ્દો: કોંગ્રેસ સાંસદ પ્રમોદ તિવારીનો સરકાર પર પ્રહાર
છેલ્લું અપડેટ : 16 Jul 2026
સંસદના આગામી ચોમાસુ સત્ર પહેલા દેશમાં રાજકીય ગરમાવો આવી ગયો છે. અયોધ્યા રામ મંદિરમાં દાન તરીકે આવેલી રકમની કથિત ઉચાપત અને ચોરીના મામલે વિપક્ષ સરકારી વહીવટીતંત્રને ઘેરવાની પૂરી તૈયારી કરી ચૂક્યું છે. કોંગ્રેસના વરિષ્ઠ નેતા અને રાજ્યસભાના સાંસદ પ્રમોદ તિવારીએ આ અંગે એક મોટું નિવેદન આપીને સંસદમાં હોબાળાના સંકેત આપી દીધા છે.
પાર્ટીના એજન્ડા અંગે વાત કરતા સાંસદ પ્રમોદ તિવારીએ સ્પષ્ટ શબ્દોમાં જણાવ્યું હતું કે, "અમે આગામી ચોમાસુ સત્રમાં રામ મંદિરના દાનમાં થયેલી કથિત ચોરીનો મુદ્દો ચોક્કસપણે ઉઠાવીશું. આ કોઈ નાનો-મોટો વિષય નથી, આ બહુ મોટો મુદ્દો છે. આ દેશના કરોડો લોકોની અતૂટ શ્રદ્ધા, આસ્થા અને વિશ્વાસ સાથે થયેલો મોટો વિશ્વાસઘાત છે."
પ્રમોદ તિવારીએ આક્ષેપ કર્યો છે કે આ સંગઠિત ભ્રષ્ટાચારના નેક્સસમાં પકડાયેલા લોકો તો માત્ર નાની માછલીઓ છે, જ્યારે આ કૌભાંડ પાછળના અસલી ગુનેગારોને દિલ્હી અને સરકારી મશીનરી દ્વારા છાવરવામાં આવી રહ્યા છે. તેમણે આ સમગ્ર મામલે સુપ્રીમ કોર્ટની દેખરેખ હેઠળ સ્વતંત્ર તપાસ કરાવવાની માંગણી ફરી એકવાર દોહરાવી છે.
નોંધનીય છે કે રામ મંદિર ટ્રસ્ટમાં નાણાકીય અનિયમિતતાના ગંભીર આરોપો લાગ્યા બાદ જનરલ સેક્રેટરી ચંપત રાય અને ટ્રસ્ટી અનિલ મિશ્રાના રાજીનામા સ્વીકારી લેવામાં આવ્યા છે અને તપાસ કમિટી પણ સક્રિય બની છે. વિપક્ષનું કહેવું છે કે જ્યારે મંદિરની ભેટ-સોગાદો અને નાણાકીય વહીવટ પર સવાલો ઉભા થયા હોય, ત્યારે દેશની જનતા સરકાર પાસે પારદર્શિતા અને જવાબદારીની અપેક્ષા રાખે છે. આ પરિસ્થિતિ જોતા આગામી સંસદ સત્રમાં આ મુદ્દે શાસક પક્ષ અને વિપક્ષ સામસામે આવી જાય તેવા પૂરેપૂરા એંધાણ છે.
