યૌન શોષણ મામલે FIR નોંધવા કોર્ટનો આદેશ, શંકરાચાર્ય સ્વામી અવિમુક્તેશ્વરાનંદને મોટો ઝટકો

પ્રયાગરાજમાં સ્પેશિયલ એડિશનલ ડિસ્ટ્રિક્ટ જજ (બળાત્કાર અને પોક્સો) કોર્ટે જ્યોતિષ પીઠના શંકરાચાર્ય સ્વામી અવિમુક્તેશ્વરાનંદ સરસ્વતી સામે જાતીય શોષણના આરોપો અંગે એક મહત્વપૂર્ણ આદેશ જારી કર્યો છે. એડિશનલ ડિસ્ટ્રિક્ટ જજ (પોક્સો) વિનોદ કુમાર ચૌરસિયાએ સ્વામી અવિમુક્તેશ્વરાનંદ સરસ્વતી અને તેમના શિષ્ય મુકુંદાનંદ ગિરી સામે FIR નોંધવાનો નિર્દેશ આપ્યો છે. કોર્ટે પોલીસને કેસ નોંધવા અને તપાસ શરૂ કરવાનો આદેશ આપ્યો છે.

X પર જુઓ

કોર્ટના આદેશ બાદ  હવે ઝુંસી પોલીસ સ્ટેશનમાં કેસ નોંધવામાં આવશે. કૃષ્ણ જન્મભૂમિ મુક્તિ નિર્માણ ટ્રસ્ટના અધ્યક્ષ અને શાકુંભરી પીઠાધીશ્વર આશુતોષ બ્રહ્મચારી મહારાજે ભારતીય દંડ સંહિતાની કલમ 173 (4) હેઠળ અરજી દાખલ કરી હતી, જેમાં FIR નોંધવા અને કડક કાર્યવાહી કરવાની માંગ કરવામાં આવી હતી. આરોપો લગાવનારા બે સગીરોના નિવેદનો 13 ફેબ્રુઆરીએ કોર્ટમાં રેકોર્ડ કરવામાં આવ્યા હતા, જેમાં વીડિયોગ્રાફી પણ સામેલ હતી. કોર્ટે પોલીસ રિપોર્ટની પણ નોંધ લીધી હતી અને સુનાવણી બાદ પોતાનો નિર્ણય અનામત રાખ્યો હતો. કોર્ટના આદેશના આધારે હવે આગળની કાનૂની કાર્યવાહી કરવામાં આવશે.

આશુતોષ બ્રહ્મચારીએ આરોપ લગાવ્યો હતો કે, માઘ મેળા દરમિયાન એક સગીર અને એક પુખ્ત બાળક તેમની પાસે આવ્યા હતા. આ બંને જણાએ સ્વામી અવિમુક્તેશ્વરાનંદ સરસ્વતી પર કુકર્મ (જાતીય ગેરવર્તણૂંક)નો આરોપ લગાવ્યો હતો. આશુતોષ બ્રહ્મચારીએ આરોપ લગાવ્યો હતો કે, સ્વામી અવિમુક્તેશ્વરાનંદ સરસ્વતીના શિષ્યો જ ગુરુ સેવાના નામે જાતીય સંબંધો માટે દબાણ કરતા હતા.