VIDEO: ‘અકાલી દળ કોઈથી ડરશે નહીં, પંજાબની શાંતિ ભંગ નહીં થવા દઉં’, કિર્પાણ હુમલા બાદ સુખબીર બાદલનું નિવેદન
છેલ્લું અપડેટ : 14 Aug 2026
મહારાષ્ટ્રના નાંદેડ સ્થિત એક ગુરુદ્વારાની અંદર નિહંગ શીખ દ્વારા કિર્પાણ વડે કરાયેલા હુમલા બાદ શિરોમણી અકાલી દળ (SAD) ના પ્રમુખ સુખબીર સિંહ બાદલે સ્પષ્ટ કર્યું છે કે તેઓ પંજાબમાં કોઈને પણ શાંતિ ડહોળવા દેશે નહીં.
હોસ્પિટલમાંથી રજા મળ્યા બાદ વાતચીત કરતા બાદલે જણાવ્યું કે, “તેઓનો હેતુ પંજાબની સ્થિતિ બગાડવાનો અને શાંતિ ભંગ કરવાનો છે, પરંતુ શિરોમણી અકાલી દળના પ્રમુખ તરીકે હું આવું ક્યારેય થવા નહીં દઉં. મારા પિતાએ પણ આવું ક્યારેય થવા દીધું નહોતું. બંને વખતે મારા પર સૌથી પવિત્ર સ્થળોએ હુમલો કરવામાં આવ્યો છે.”
તેમણે વધુમાં ઉમેર્યું, “અકાલી દળ કોઈ વાતથી ડરતું નથી અને પંજાબની શાંતિ ભંગ કરવા માંગતા લોકો સામે અમે ઝૂકીશું નહીં. ઈશ્વર મારી સાથે છે.”
૯૦ મિનિટ સુધી સર્જરી ચાલી હતી
ગુરુવારે નાંદેડ શહેરના સીમાડે આવેલા ગુરુદ્વારા માતા સાહિબ દેવાન જી મુગટ ખાતે એક નિહંગે બાદલ પર કિર્પાણ વડે હુમલો કર્યો હતો, જેના પછી તેમની લગભગ ૯૦ મિનિટ સુધી સર્જરી ચાલી હતી. તબીબોના જણાવ્યા મુજબ, હાલમાં તેમની સ્થિતિ સ્થિર છે અને તેઓ ખતરાથી બહાર છે.
યશોસાઈ હોસ્પિટલના તબીબે જણાવ્યું કે, “સર્જરી દોઢ કલાક સુધી ચાલી હતી. તેમના હાથના સ્નાયુઓ (Tendon) અને ઉલ્નાર ધમનીને (Ulnar Artery) નુકસાન પહોંચ્યું હતું જેનું તબીબો દ્વારા સમારકામ (Repair) કરવામાં આવ્યું છે. તેઓ હવે સંપૂર્ણપણે ખતરાથી બહાર છે.”
હુમલા બાદ બાદલને યશોસાઈ હોસ્પિટલમાં ખસેડવામાં આવ્યા હતા. ત્યારબાદ તેમને રજા આપવામાં આવી છે અને અધિકારીઓના જણાવ્યા મુજબ બપોરે તેઓ વિમાન મારફતે પંજાબ જવા રવાના થશે.
નોંધનીય છે કે, આ પહેલા ડિસેમ્બર ૨૦૨૪ માં પણ સુવર્ણ મંદિરના પ્રવેશદ્વાર પર બાદલ પર જાનલેવા હુમલાનો પ્રયાસ થયો હતો, જેમાં તેઓ બચી ગયા હતા.
ગુરુદ્વારાની અંદર બાદલ પર હુમલો
પોલીસના જણાવ્યા અનુસાર, આરોપી જસપાલ સિંહે ગુરુદ્વારાની અંદર બાદલ પર હુમલો કર્યો હતો. તેણે શા માટે આ હુમલો કર્યો તે અંગેનું ચોક્કસ કારણ હજુ જાણવા મળ્યું નથી. ૬૦ થી ૬૨ વર્ષની વય ધરાવતો જસપાલ સિંઘ કોમર્સ અને લો (Commerce and Law) નો અભ્યાસ કરી ચૂક્યો છે અને તેનો પરિવાર પુણેમાં રહે છે. તે છેલ્લા બે વર્ષથી ગુરુદ્વારામાં સેવા દાર તરીકે કામ કરતો હતો અને નાંદેડમાં એકલો રહેતો હતો.
આ ઘટના અંગે મુદખેડ પોલીસ સ્ટેશને જસપાલ સિંહ વિરુદ્ધ ભારતીય ન્યાય સંહિતાની વિવિધ કલમો (હત્યાનો પ્રયાસ, ખતરનાક હથિયારથી ઈજા પહોંચાડવી અને સરકારી કર્મચારીની ફરજમાં રુકાવટ) તેમજ આર્મ્સ એક્ટ હેઠળ ગુનો નોંધી કાયદેસરની કાર્યવાહી હાથ ધરી છે.