VIDEO: એર માર્શલ આશુતોષ દીક્ષિત બન્યા ભારતીય વાયુસેનાના નવા વડા
છેલ્લું અપડેટ : 07 Oct 2026
ભારતીય વાયુસેનાની કમાન હવે ફાઈટર પાઈલટ એર માર્શલ આશુતોષ દીક્ષિતના હાથમાં સોંપવામાં આવી છે. તેઓ વાયુસેનાના નવા એર ચીફ માર્શલ તરીકે નિમણૂક પામ્યા છે. હાલમાં તેઓ વાયુસેનાના 51મા વાઈસ ચીફ ઓફ એર સ્ટાફ તરીકે ફરજ બજાવી રહ્યા છે, જે પદ તેમણે 1 જુલાઈ 2026ના રોજ સંભાળ્યું હતું. તેઓ આગામી 31 ઓક્ટોબરે સત્તાવાર રીતે વાયુસેના પ્રમુખ તરીકેનો ચાર્જ સંભાળશે. એર માર્શલ આશુતોષ દીક્ષિત 6 ડિસેમ્બર 1986ના રોજ વાયુસેનાની ફાઈટર સ્ટ્રીમમાં કમિશન થયા હતા. તેઓ નેશનલ ડિફેન્સ એકેડેમી ખડકવાસલા, ડિફેન્સ સર્વિસીસ સ્ટાફ કોલેજઅને નેશનલ ડિફેન્સ કોલેજના પૂર્વ વિદ્યાર્થી રહ્યા છે. એક અત્યંત કુશળ ફાઈટર પાઈલટ તરીકે જાણીતા દીક્ષિત પાસે 20થી વધુ પ્રકારના વિમાનો પર 3 હજાર 300 કલાકથી પણ વધુ સમય ઉડાન ભરવાનો બહોળો અનુભવ છે. જેમાં મિરાજ-2000, મિગ-21, જગુઆર, એન-32 અને હોક જેવા વિમાનોનો સમાવેશ થાય છે. તેઓ એક લાયકાત ધરાવતા ફ્લાઈંગ ઈન્સ્ટ્રક્ટર અને એક્સપેરિમેન્ટલ ટેસ્ટ પાઈલટ પણ છે.
