પાકિસ્તાનનું F-16 તોડી પાડનાર અભિનંદન વર્ધમાને છોડી વાયુસેનાની નોકરી, જાણો કારણ
છેલ્લું અપડેટ : 03 Sept 2026
ભારતીય વાયુસેનાના (Indian Air Force) બહાદુર અધિકારી અને વિંગ કમાન્ડર તરીકે દેશભરમાં જાણીતા થયેલા અભિનંદન વર્ધમાન (Abhinandan Varthaman)ને લઈને એક મોટા સમાચાર સામે આવ્યા છે. મળતી માહિતી અનુસાર, અભિનંદન વર્ધમાને ભારતીય વાયુસેનાની નોકરી છોડી દીધી છે અને હવે તેઓ પ્રાઇવેટ એરલાઇન (Private Airline) સાથે પાઇલટ તરીકે જોડાયા છે.
મીડિયા રિપોર્ટ્સ અનુસાર, અભિનંદન વર્ધમાન ઓગસ્ટ મહિનાથી ગોવા સ્થિત પ્રાદેશિક એરલાઇન (Regional Airline) Fly91 સાથે પાઇલટ તરીકે કામ શરૂ કરી ચૂક્યા છે. જોકે, તેમની નવી ભૂમિકા અંગે એરલાઇન તરફથી સત્તાવાર રીતે હજુ કોઈ વિગતવાર માહિતી આપવામાં આવી નથી.
પાકિસ્તાનના F-16 સામેની કાર્યવાહીથી બન્યા હતા હીરો
અભિનંદન વર્ધમાનનું નામ વર્ષ 2019માં થયેલી ભારત-પાકિસ્તાન વચ્ચેની તંગ પરિસ્થિતિ દરમિયાન સમગ્ર દેશમાં ચર્ચામાં આવ્યું હતું. બાલાકોટ એરસ્ટ્રાઇક (Balakot Airstrike) બાદ ભારત અને પાકિસ્તાન વચ્ચે હવાઈ અથડામણ થઈ હતી. આ દરમિયાન અભિનંદન વર્ધમાને પાકિસ્તાની વાયુસેનાના F-16 લડાકુ વિમાનને તોડી પાડ્યું હોવાનો ભારત તરફથી દાવો કરવામાં આવ્યો હતો.
આ હવાઈ અથડામણ દરમિયાન તેમનું MiG-21 Bison વિમાન પણ ક્રેશ થયું હતું અને તેઓ પાકિસ્તાનના કબજા હેઠળના વિસ્તારમાં પહોંચી ગયા હતા. ત્યારબાદ તેઓ ભારત પરત ફર્યા હતા. તેમની હિંમત અને શૌર્યને કારણે તેઓ દેશભરમાં રાષ્ટ્રીય હીરો તરીકે ઓળખાયા હતા.
Fly91 તરફથી હજુ સત્તાવાર પુષ્ટિ નહીં
અભિનંદન વર્ધમાન હવે Fly91 સાથે જોડાયા હોવાના અહેવાલો સામે આવ્યા છે, પરંતુ એરલાઇનના પ્રવક્તાએ તેમની કર્મચારી સંબંધિત માહિતી (Personal Information) અંગે ટિપ્પણી કરવાનો ઇનકાર કર્યો છે. પ્રવક્તાના જણાવ્યા મુજબ, કર્મચારીઓની વ્યક્તિગત માહિતી ખાનગી બાબત છે.
Fly91એ માર્ચ 2024માં પોતાનું વ્યાવસાયિક સંચાલન (Commercial Operations) શરૂ કર્યું હતું. હાલમાં એરલાઇનના કાફલામાં છ વિમાન હોવાનું જણાવાય છે અને તેના બે ઓપરેશનલ બેઝ (Operational Bases) ગોવા અને હૈદરાબાદમાં છે.
અભિનંદન વર્ધમાનની વાયુસેનાથી પ્રાઇવેટ એરલાઇનમાં આ નવી કારકિર્દી (Career) દેશભરમાં ફરી એકવાર ચર્ચાનો વિષય બની છે.
