પંજાબમાં AAP નેતાની કાર પર અંધાધૂંધ ફાયરિંગ, સાથીનું મોત; બાલબાલ બચ્યા નેતા
છેલ્લું અપડેટ : 30 Aug 2026
પંજાબના ફિરોઝપુર (Ferozepur) જિલ્લામાં શનિવારે મોડી રાત્રે થયેલા ફાયરિંગ (Firing)ની ઘટનાથી સમગ્ર વિસ્તારમાં ભયનો માહોલ સર્જાયો છે. મામદોટ (Mamdot) શહેરના મુખ્ય બજારમાં ચાર કાર સવાર હુમલાખોરોએ ગોળીબાર કર્યો હતો. આ હુમલામાં 45 વર્ષીય ગુરપ્રીત સિંહ ઉર્ફે ગોપીનું મોત થયું છે, જ્યારે 22 વર્ષીય હરપ્રીત સિંહ ઉર્ફે હેપ્પી ગંભીર રીતે ઘાયલ થયો છે.
હુમલાખોરોએ નવા ચૂંટાયેલા આમ આદમી પાર્ટી (AAP)ના મામદોટ નગર પંચાયત પ્રમુખ વિકી મૈનીની કારને પણ નિશાન બનાવી હતી. કાર પર ગોળીઓ વાગી હોવા છતાં વિકી મૈની આ હુમલામાં સહીસલામત બચી ગયા હતા.
ચાર હુમલાખોરોએ અચાનક કર્યો ગોળીબાર
મળતી માહિતી મુજબ, ગુરપ્રીત સિંહ અને હરપ્રીત સિંહ મોટરસાઇકલ પર જઈ રહ્યા હતા. તે દરમિયાન કારમાં આવેલા ચાર હુમલાખોરોએ મુખ્ય બજારમાં તેમની તરફ ગોળીઓ ચલાવી હતી. હુમલાખોરો કારમાંથી નીચે ઉતર્યા અને અનેક રાઉન્ડ ફાયરિંગ કર્યું હતું.
ગોળીબારમાં ગુરપ્રીત સિંહને ગંભીર ઈજાઓ થઈ હતી અને તેમનું મોત થયું હતું. જ્યારે હરપ્રીત સિંહને પણ ગોળી વાગતાં તેમની હાલત ગંભીર બની હતી. પ્રાથમિક સારવાર બાદ તેમને વધુ સારવાર માટે લુધિયાણા (Ludhiana)ની હોસ્પિટલમાં રિફર કરવામાં આવ્યા છે.
AAP નેતાની કારને પણ બનાવી નિશાન
ફાયરિંગ સમયે વિકી મૈની ઘટનાસ્થળ નજીક પોતાની કારમાં હાજર હતા. હુમલાખોરોએ તેમની કાર પર પણ ગોળીઓ ચલાવી હતી. કારને નુકસાન થયું હોવા છતાં વિકી મૈનીને કોઈ ઈજા થઈ નથી.
આ ઘટનાના પગલે મામદોટમાં પોલીસ (Police)નો કાફલો ઘટનાસ્થળે પહોંચ્યો હતો અને તપાસ શરૂ કરી હતી. પોલીસે હુમલાખોરોની ઓળખ કરી લીધી હોવાનું અધિકારીઓએ જણાવ્યું છે અને તેમને પકડવા માટે અલગ-અલગ ટીમો રવાના કરવામાં આવી છે.
નગર પંચાયત ચૂંટણીની અદાવતનો એંગલ
ફિરોઝપુરના SSP ભૂપિન્દર સિંહે જણાવ્યું કે પ્રાથમિક તપાસમાં આ હુમલો વ્યક્તિગત અદાવત (Personal Enmity) સાથે જોડાયેલો હોવાની શક્યતા સામે આવી છે. તાજેતરમાં યોજાયેલી નગર પંચાયત ચૂંટણી દરમિયાન થયેલા વિવાદને કારણે ફાયરિંગ થયું હોવાની પોલીસને શંકા છે.
પોલીસે આરોપીઓને ઝડપી પાડવા માટે દરોડા (Raids) શરૂ કર્યા છે. સમગ્ર મામલે વધુ તપાસ ચાલી રહી છે અને હુમલા પાછળનું ચોક્કસ કારણ તથા આરોપીઓની ભૂમિકા અંગે તપાસ બાદ વધુ માહિતી સામે આવી શકે છે.