VIDEO : પોલીસ-ગુનેગાર વચ્ચે સામસામે ગોળીબાર, હરદોઈમાં 50 હજારનો ઈનામી બદમાશ ઠાર મરાયો
છેલ્લું અપડેટ : 06 May 2026
સોર્સ : GSTV
ઉત્તર પ્રદેશના હરદોઈ જિલ્લામાં પોલીસ અને ગુનેગારો વચ્ચે થયેલા ભીષણ એન્કાઉન્ટરમાં 50,000 રૂપિયાનું ઈનામ ધરાવતો એક રીઢો ગુનેગાર ઠાર મરાયો છે. આ ઓપરેશન દરમિયાન વળતા હુમલામાં એક પોલીસ અધિકારી પણ ઘાયલ થયા હોવાના અહેવાલ છે. પોલીસને બાતમી મળી હતી કે મોસ્ટ વોન્ટેડ ગુનેગાર આ વિસ્તારમાં છુપાયેલો છે, જેના આધારે ઘેરાબંધી કરવામાં આવી હતી.
પોલીસે જ્યારે ગુનેગારને આત્મસમર્પણ કરવા જણાવ્યું ત્યારે આરોપીએ પોલીસ ટીમ પર અંધાધૂંધ ફાયરિંગ શરૂ કરી દીધું હતું. આત્મરક્ષણ માટે પોલીસે કરેલા વળતા ફાયરિંગમાં ગુનેગાર ગંભીર રીતે ઘાયલ થયો હતો અને બાદમાં તેનું મૃત્યુ થયું હતું. આ અથડામણમાં ઘાયલ થયેલા પોલીસ અધિકારીને તાત્કાલિક સારવાર માટે નજીકની હોસ્પિટલમાં દાખલ કરવામાં આવ્યા છે, જ્યાં તેમની હાલત સ્થિર હોવાનું જાણવા મળ્યું છે.
