VIDEO: માંજલપુર પેટા ચૂંટણીમાં 40 ટકા જેટલું મતદાન, ઉમેદવારોનું ભાવિ EVMમાં સીલ, 3 ઓગસ્ટે પરિણામ
છેલ્લું અપડેટ : 30 Jul 2026
વડોદરાની માંજલપુર વિધાનસભા પેટા ચૂંટણીનું મતદાન શાંતિપૂર્ણ માહોલમાં સફળતાપૂર્વક પૂર્ણ થયું છે. મતદાન પ્રક્રિયા પૂર્ણ થતાં જ તમામ મતદાન મથકો પર ઇલેક્ટ્રોનિક વોટિંગ મશીન (EVM)ને ચૂંટણી પંચની માર્ગદર્શિકા મુજબ સીલ કરવામાં આવ્યા હતા. ત્યારબાદ કડક પોલીસ સુરક્ષા વચ્ચે તમામ EVMને ભવન્સ સ્કૂલ ખાતે સ્થિત સ્ટ્રોંગ રૂમમાં પહોંચાડવામાં આવ્યા હતા. અહીં ચુસ્ત પોલીસ બંદોબસ્ત ગોઠવવામાં આવ્યો છે. સ્ટ્રોંગ રૂમની 24 કલાક દેખરેખ રાખવામાં આવશે અને સુરક્ષાના તમામ જરૂરી પગલાં લેવામાં આવ્યા છે જેથી મતદાન પ્રક્રિયાની પારદર્શિતા જળવાઈ રહે. ચૂંટણી અધિકારીઓ અને પોલીસ તંત્ર સમગ્ર પ્રક્રિયા પર સતત નજર રાખી રહ્યા છે.
પ્રાથમિક અંદાજ મુજબ માંજલપુર પેટા ચૂંટણીમાં આશરે 40 ટકા જેટલું મતદાન નોંધાયું હોવાનું સામે આવ્યું છે. જોકે, અંતિમ અને સત્તાવાર મતદાન ટકાવારી જાહેર થવામાં હજુ થોડો સમય લાગી શકે છે. તમામ મતદાન મથકો પરથી મળતી વિગતોનું સંકલન કર્યા બાદ ચૂંટણી પંચ દ્વારા અંતિમ આંકડા જાહેર કરવામાં આવશે. હવે તમામની નજર આગામી 3 ઓગસ્ટે યોજાનારી મતગણતરી પર છે. તે દિવસે ભવન્સ સ્કૂલ ખાતે જ કડક સુરક્ષા વ્યવસ્થા વચ્ચે મતગણતરી હાથ ધરવામાં આવશે. સમગ્ર પોલીસ બંદોબસ્ત અને સુરક્ષા વ્યવસ્થા અંગે ડીસીપી ઝોન-3 દ્વારા માહિતી આપવામાં આવી હતી અને મતગણતરી સુધી સ્ટ્રોંગ રૂમ પર સતત નજર રાખવામાં આવશે તેવું જણાવ્યું હતું.
