Surat News: વરસાદી પાણીના ભરાવા સાથે ભુવા પડવાનું પણ શરુ, અલગ અલગ વિસ્તારમાં રોડ પર પડ્યાં ગાબડાં
છેલ્લું અપડેટ : 23 Jun 2025
સુરતમાં આજના દેમાર વરસાદ બાદ પાણીના ભરાવાની સમસ્યા સાથે હવે ભુવા પડવાની સમસ્યા પણ બહાર આવી રહી છે. શહેરના કતારગામ ઝોનમાં આવેલા અમરોલી વિસ્તારમાં એક મોટો ભુવો પડ્યો છે જોકે, હજી સુધી પાલિકા તંત્ર પહોંચ્યું ન હોવાથી અકસ્માતની ભીતિ છે.
લોકોમાં આક્રોશ
સુરતમાં પાલિકાની પ્રિમોન્સુન કામગીરી સામે પહેલેથી જ સવાલ ઉઠી રહ્યા છે તેમાં આજે ઠેર ઠેર પાણીના ભરાવાના કારણે શહેરના અનેક વિસ્તારમાં લોકોની હાલત કફોડી થઈ રહી છે. લોકો પાલિકાની કામગીરી સામે આક્રોશ વ્યક્ત કરી રહ્યા છે. હાલમાં પાણી ભરાવાની સમસ્યા સાથે સાથે હવે ભુવા પડવાની સમસ્યા શરૂ થઈ છે.
રજવાડી પાર્ટી પ્લોટ સામે ભુવો પડ્યો
આજે સવારે અમરોલી વિસ્તારમાં આવેલા રજવાડી પાર્ટી પ્લોટ સંસ્કૃત રો-હાઉસ નજીક રસ્તા પર મોટો ભુવો પડી ગયો છે. જોકે, બપોર સુધી તંત્ર પહોંચ્યું ન હોવાથી લોકોમાં રોષ જોવા મળી રહ્યો છે. વરસાદના પાણી ઓસર્યા બાદ અનેક જગ્યાએ ભુવા પડવા કે ટ્રેન્ચ બેસી જવાની ફરિયાદ બહાર આવે તેવી શક્યતા નકારી શકાતી નથી.
