રૂપાલાની વિવાદિત ટિપ્પણીનો મામલો, આજે ગોંડલ ખાતે યોજાનાર બેઠકમાં આ અગ્રણીઓ રહી શકે છે ઉપસ્થિત

Lok Sabha Elections 2024: લોકસભાની રાજકોટ બેઠક પર ભાજપના ઉમેદવાર જાહેર થયેલા કેન્દ્રીય મંત્રી પરશોત્તમ રૂપાલાએ રાજા મહારાજાઓ, ક્ષત્રિય સમાજની લાગણી દુભાય તેવી ખોટી અને નિમ્નસ્તરીય ટિપ્પણીથી રાજ્યભરમાં ક્ષત્રિય સમાજમાં રોષ ફેલાયો છે. ત્યારે પરશોત્તમ રૂપાલાની ક્ષત્રિય સમાજ અંગે ટિપ્પણી કરવાના મામલે આજે બપોર બાદ ગોંડલ ખાતે બેઠક યોજાશે. ગોંડલ ખાતે યોજાવા જઈ રહેલા આ સંમેલનમાં સૌરાષ્ટ્રના આ અગ્રણીઓ ઉપસ્થિત રહી શકે છે.

1. કેસરીદેવસિંહ ઝાલા,રાજ્ય સભાના સાંસદ રાજવી વાંકાનેર..
2. વિરેન્દ્રસિંહ જાડેજા ભાજપના ધારાસભ્ય કચ્છ
3. પ્રદ્યુમનસિંહ જાડેજા ભાજપના ધારાસભ્ય અબડાસા
4. કિરીટસિંહ રાણા ભાજપના ધારાસભ્ય લીમડી.
5. જયરાજસિંહ જાડેજા પૂર્વ ધારાસભ્ય ગોંડલ
6. હકુભા જાડેજા પૂર્વ ધારાસભ્ય જામનગર.
7. વિરેન્દ્રસિંહ જાડેજા મહામંત્રી શહેર ભાજપ રાજકોટ
8. નરેન્દ્ર સિંહ જાડેજા પ્રમુખ રાજકોટ લોધિકા સંઘ.
9. નરેન્દ્ર સિંહ જાડેજા મહામંત્રી જિલ્લા ભાજપ.

રૂપાલાની ટિકિટ રદ કરે તેવી ક્ષત્રિય સમાજની માંગ

ગરુવારે રાજ્યના 90 જેટલા ક્ષત્રિય સંગઠનોના હોદ્દેદારો, પ્રતિનિધિઓની બોટાદ ચોકડી પાસે રાજપૂત સમાજ ભવન ખાતે બેઠક યોજાઈ હતી. જેમાં રૂપાલા સામે તીવ્ર રોષ વ્યક્ત કરીને તેમની લોકસભામાં ઉમેદવારી રદ કરાય તેવી માંગણી ઉચ્ચારાઈ છે. આ અંગે ક્ષત્રિય આગેવાન પી.ટી.જાડેજાનો સંપર્ક સાધતા જણાવ્યું કે રાજકીય નેતાઓ સમાધાનના પ્રયાસો થઈ રહ્યાની વાતો કરે છે પરંતુ, અમે આવા કોઈ પ્રયાસો કર્યા નથી. પરશોત્તમ રૂપાલા પોતે એક શિક્ષિત વ્યક્તિ છે, તેમણે ભાષણમાં જે કહ્યું તે જાણીબુઝીને કહ્યું છે અને તેને માત્ર એક વીડિયોમાં માફી માંગી લે એટલે માફ કરી દેવા ક્ષત્રિય સમાજ તૈયાર નથી. ભાજપ તેની ઉમેદવારી રદ કરે તેવી માંગણી અમે કરી છે. 

લાઠી સ્ટેટના રાજવી પરિવારના વંશજે કર્યો બદનક્ષીનો દાવો

કોંગ્રેસ નેતા અને લાઠી સ્ટેટનાં રાજવી પરિવારના વંશજ આદિત્યસિંહ ગોહિલે રાજકોટ કોર્ટમાં ધસી જઈને પરશોત્તમ રૂપાલા સામે જાહેરસભામાં મત મેળવવાની લાલચે ક્ષત્રિય સમાજને નીચા દેખાડવા તેવો વીડિયો વાયરલ થયો છે તે અંગે આઈ.પી.સી.499, 500 હેઠળ ફરિયાદ કરી છે. રૂપાલા સામેના રોષને વાચા આપવા ત્રણ-ચાર દિવસ બાદ રાજકોટમાં ક્ષત્રિયોનું મહાસંમેલન યોજવા પણ જાહેર કરાયું છે તેમ ક્ષત્રિય આગેવાનોએ જણાવ્યું હતું.

રૂપાલા સામે ઊંઝામાં પોલીસ ફરિયાદ

ભાજપના ઉમેદવાર પરશોત્તમ રૂપાલાએ ક્ષત્રિય સમાજ વિરુધ્ધ ટિપ્પણી કરતાં ક્ષત્રિય સમાજમાં બેઠકોનો દોર શરૂ થયો છે. એટલું જ નહીં, સૌરાષ્ટ્ર બાદ ઉત્તર ગુજરાતમાં ય વિરોધ વંટોળ ઉઠ્યો છે. ઉંઝામાં રુપાલા વિરૂધ્ધ પોલીસ સ્ટેશને ફરિયાદ આપવામાં આવી છે. અમદાવાદમાંય ક્ષત્રિયોની એક બેઠક મળી હતી, જેમાં મતના માધ્યમથી ભાજપને સબક શિખવાડવા નક્કી કરાયું છે. બીજી તરફ, આ વિવાદને થાળે પાડવા ભાજપ પ્રદેશ પ્રમુખ સી.આર.પાટીલે ગોંડલના પૂર્વ ધારાસભ્ય જયરાજસિંહ જાડેજાને મેદાને ઉતાર્યા છે. જોકે અન્ય ક્ષત્રિયો એકેય આગેવાનનું માનવા તૈયાર નથી. રાજ્ય ચૂંટણી પંચમાં રુપાલા વિરુધ્ધ ફરિયાદ થઈ છે. ચૂંટણી પંચે રાજકોટ કલેક્ટર પાસે રિપોર્ટ માંગ્યો છે.