VIDEO/ દેડિયાપાડાના અંતરિયાળ વિસ્તારોમાં કરા સાથે માવઠું

નર્મદા: ગુજરાતમાં મે મહિનાની કાળઝાળ ગરમી વચ્ચે હવામાનમાં અચાનક પલટો આવ્યો છે. નર્મદા જિલ્લાના દેડિયાપાડા તાલુકામાં વીજળીના કડાકા-ભડાકા અને તેજ પવન સાથે કમોસમી વરસાદ (માવઠું) ખાબક્યો છે. ખાસ કરીને તાલુકાના પૂર્વ પટ્ટીના અંતરિયાળ ડુંગરાળ વિસ્તારોમાં કરા સાથે વરસાદ પડતા ખેડૂતોની ચિંતામાં મસમોટો વધારો થયો છે.

કરા સાથે વરસાદથી જળબંબાકાર

દેડિયાપાડાના પૂર્વ વિસ્તારમાં આવેલા અણદુ, વેડછા અને તેની આસપાસના ગ્રામ્ય વિસ્તારોમાં અચાનક વાતાવરણ બદલાયું હતું. ધૂળની ડમરીઓ અને પવન સાથે શરૂ થયેલા વરસાદમાં કરા પણ પડ્યા હતા. ટૂંકા ગાળાના વરસાદમાં જ નીચાણવાળા વિસ્તારોમાં પાણી ભરાઈ ગયા હતા, જેના કારણે રસ્તાઓ પર ચોમાસા જેવો માહોલ જોવા મળ્યો હતો.

ખેતી પાકોને વ્યાપક નુકસાન

આ કમોસમી વરસાદે જગતના તાતની મહેનત પર પાણી ફેરવી દીધું છે. ખેતરોમાં તૈયાર થયેલા વિવિધ પાકોને માઠી અસર પહોંચી છે:

• ઉનાળુ પાક: તૈયાર થઈ ગયેલા લીલા મગ, મકાઈ અને તુવેર પાપડીના પાકને ભારે નુકસાન થયું છે.

• શાકભાજી: પવન અને વરસાદને કારણે શાકભાજીની ખેતી કરતા ખેડૂતો પાયમાલ થયા છે.

• કેરીનો પાક: આ પવન અને કરાને કારણે આંબા પરથી કેરીઓ ખરી પડતા આંબાવાડિયાના માલિકોને આર્થિક ફટકો પડ્યો છે.

• ઘાસચારો: ખેતરોમાં રાખેલો પશુઓ માટેનો ઘાસચારો પલળી જતાં પશુપાલકોની મુશ્કેલી પણ વધી છે.

વીજળીના કડાકા-ભડાકાથી ફફડાટ

માત્ર વરસાદ જ નહીં, પરંતુ વીજળીના ભયાનક કડાકા-ભડાકા અને તેજ ફૂંકાયેલા પવનને કારણે સ્થાનિકોમાં ફફડાટ જોવા મળ્યો હતો. અચાનક આવેલા આ કુદરતી આફત સમાન માવઠાએ દેડિયાપાડા પંથકની ખેતીને રુંધવાનું કામ કર્યું છે. ખેડૂતો હવે સરકાર પાસે નુકસાનીના સર્વે અને સહાયની આશા રાખી રહ્યા છે.