Narmada News/ VIDEO: Statue of Unity આરોગ્ય વન નજીક દીપડો દેખાયો, સ્થાનિકોમાં ભયનો માહોલ
છેલ્લું અપડેટ : 12 Apr 2025
નર્મદા જિલ્લાના વિશ્વવિખ્યાત સ્ટેચ્યુ ઓફ યુનિટી વિસ્તારમાં આવેલા આરોગ્યવન નજીક છેલ્લા કેટલાક દિવસોથી દીપડો જોવા મળ્યો હોવાના સમાચાર સામે આવતા ચકચાર મચી ગઈ છે. તાજેતરમાં રાત્રિના સમયે સ્થાનિક લોકોએ દીપડાને ખૂલે રસ્તા પર ભટકતા જોયો હતો અને તેનો વીડિયો પણ બનાવીને સોશિયલ મીડિયા પર શેર કર્યો છે. આ વીડિયોને લઈ પર્યટકો અને સ્થાનિકોમાં ભયનું વાતાવરણ સર્જાયું છે.આ પહેલો કિસ્સો નથી. અગાઉ પણ આ વિસ્તારની નજીક આવેલા જંગલ સફારીમાં દીપડો ઘૂસી ગયો હતો જેના પરિણામે કેટલાક નિર્દોષ વન્યપ્રાણીઓના મોત થયા હતા. હવે ફરીથી આરોગ્યવન નજીક દીપડાની હાજરીના નિર્દેશો મળતા વનવિભાગની કામગીરી પર પણ સવાલ ઊભા થઈ રહ્યા છે.
દેશ વિદેશથી પ્રવાસીઓ આવે છે
સ્ટેચ્યુ ઓફ યુનિટી રાજ્યના મહત્વપૂર્ણ પર્યટન સ્થળો પૈકી એક છે જ્યાં દરરોજ હજારો દેશી-વિદેશી પ્રવાસીઓ મુલાકાતે આવે છે. આરોગ્યવન, યોગઆસન વિસ્તાર, એકતાનગર સ્ટેશન અને અન્ય આસપાસના સ્થળો પર લોકો વહેલી સવારથી લઇ રાત સુધી યાત્રા કરે છે. આવી સ્થિતિમાં કોઈ વન્યપ્રાણી, ખાસ કરીને મરખાં શિકારી દીપડો ખુલ્લા વિસ્તારમાં ભટકતો જોવા મળે તો તે પ્રવાસીઓ માટે જોખમરૂપ બની શકે છે.
દીપડાને પકડવા કાર્યવાહી
પ્રાપ્ત માહિતી અનુસાર, વનવિભાગ દ્વારા આ ઘટનાની નોંધ લઈ લેવામાં આવી છે અને દીપડાના અસ્તિત્વની પુષ્ટિ માટે ટ્રેપ કેમેરા તેમજ પગના નિશાનના આધારે તપાસ શરૂ કરવામાં આવી છે. સ્થાનિક લોકોએ અને પર્યટકોના સુરક્ષા મુદ્દાને ધ્યાનમાં રાખી દીપડાને ઝડપથી પાંજરે પુરવા માટે કડક પગલાં લેવામાં આવે તેવી માંગ ઉઠાવી છે. વનવિભાગના અધિકારીઓએ જણાવ્યું હતું કે, "અમે વીડિયો તથા ચિંતાજનક સ્થળોની નિહાળણી કરી રહ્યા છીએ. દીપડાને પકડવા માટે ફંદા ગોઠવવામાં આવશે તેમજ પર્યટન વિસ્તારોમાં તપાસ કરાશે જેથી કોઈ દુર્ઘટના ન બને."
