Bharuch: પિલુદ્રામાં કેમિકલ યુક્ત ડસ્ટથી ખેડૂતોમાં રોષ, કંપનીના ગેટ પર કર્યો ઘેરાવ
છેલ્લું અપડેટ : 24 Nov 2025
ભરૂચ જિલ્લાના જંબુસર તાલુકાના પિલુદ્રા પંથકના ખેડૂતો છેલ્લા કેટલાક સમયથી કંપનીઓના બેફામ પ્રદૂષણને કારણે ભારે મુશ્કેલીમાં મુકાયા છે. વહેલી સવારે સમગ્ર પંથકમાં ધુમ્મસની સાથે અત્ર-તત્ર-સર્વત્ર વાદળી કલરની કેમિકલ યુક્ત ડસ્ટ જોવા મળતાં ખેતી અને પર્યાવરણને ગંભીર નુકસાન થવાની ભીતિ સેવાઈ રહી છે. કેમિકલ યુક્ત ડસ્ટના પગલે ધરતીપુત્રોમાં ભારે આક્રોશ ફેલાયો છે. આ ડસ્ટ ફેલાવવા બદલ ખેડૂતોએ પિલુદ્રા ગામની આજુબાજુ આવેલ બે કંપનીઓ – પાશ્ર્વનાથ કેમિકલ અને બોદલ કેમિકલ પર સીધા આક્ષેપો કર્યા છે. વાહનો, રોડ-રસ્તા, ઝાડ-પાન, ઘાસચારા અને ખેતીના પાક પર આ વાદળી કેમિકલ જોવા મળ્યું હતું. જેના કારણે જગતના તાત માથે મોટું સંકટ તોળાઈ રહ્યું છે.
ન્યાય મેળવવા માટે સવારથી જ ખેડૂતોના લોકટોળા કંપનીના ગેટ પર ઊમટી પડ્યા હતા. કોઈપણ અનિચ્છનીય ઘટના ન બને તે માટે વેડચ પોલીસ અને પાદરા પોલીસનો કાફલો કંપનીના ગેટ પર તૈનાત રહ્યો હતો. કેમિકલ ડસ્ટની ગંભીરતાને ધ્યાનમાં રાખીને, ધરતીપુત્રો સાંજના ચાર વાગ્યા સુધી ખાધા-પીધા વગર પોતાના ન્યાય માટે કંપનીના ગેટ પર ઝઝૂમતા રહ્યા હતા. આ દરમિયાન ભરૂચ પ્રદૂષણ બોર્ડના અધિકારીઓ ઘટનાસ્થળે પહોંચ્યા હતા અને કેમિકલ યુક્ત ડસ્ટના સેમ્પલ એકઠા કર્યા હતા.