VIDEO: ગરબાનાં વાજિંત્રોની ખરીદી અને રિપેરિંગ માટે બજારોમાં ધમધમાટ

નવરાત્રીને હવે ગણતરીના દિવસો બાકી છે ત્યારે ભરૂચમાં ગરબાના વાજિંત્રોની ખરીદી અને રિપેરિંગ માટે બજારોમાં ધમધમાટ જોવા મળી રહ્યો છે. ખેલૈયાઓ અને ગરબા આયોજકો તૈયારીઓને આખરી ઓપ આપી રહ્યા છે, ત્યારે જૂના ભરૂચના હાથીખાના બજારમાં વાજિંત્રોના વેપારીઓ પણ વ્યસ્ત બન્યા છે. ઓક્ટોપેડ અને કેસિયો જેવા આધુનિક વાદ્યોનો ક્રેઝ વધ્યો હોવા છતાં તબલા, ઢોલક અને હાર્મોનિયમની માંગ આજે પણ અકબંધ છે. પેઢીગત વ્યવસાય સાથે જોડાયેલા કારીગરો પાસે ગ્રામ્ય વિસ્તારોમાંથી પણ વાજિંત્રો રિપેરિંગ માટે આવી રહ્યાં છે. વેપારીઓના જણાવ્યા મુજબ, તબલાની થાપ અને હાર્મોનિયમના સૂર વિના ગરબાની અસલ જમાવટ અધૂરી છે. આમ, ભરૂચમાં પરંપરાગત સંગીતના સૂર સાથે નવરાત્રીનો માહોલ જામવા લાગ્યો છે.