ગુજરાતમાં આગામી 48 કલાક ભારે વરસાદની આગાહી, દક્ષિણ ગુજરાતમાં રેડ એલર્ટ

ગુજરાતમાં આગામી સાત દિવસ સુધી વરસાદી માહોલ યથાવત રહેવાની હવામાન વિભાગે આગાહી કરી છે. રાજ્યમાં આગામી 48 કલાક દરમિયાન ભારેથી અતિભારે વરસાદ વરસી શકે છે. હાલ રાજ્ય પર એકસાથે ચાર હવામાની સિસ્ટમ સક્રિય હોવાથી વરસાદની તીવ્રતા વધવાની શક્યતા વ્યક્ત કરવામાં આવી છે. તેમાં વેસ્ટર્ન ડિસ્ટર્બન્સ, અપર એર સાયક્લોનિક સર્ક્યુલેશન, શિયર ઝોન અને સક્રિય મોન્સૂન ટ્રફનો સમાવેશ થાય છે. 

હવામાન વિભાગે આજે દક્ષિણ ગુજરાતના અનેક જિલ્લાઓ માટે રેડ એલર્ટ જાહેર કર્યું છે. નવસારી, વલસાડ, ડાંગ, તાપી સહિતના વિસ્તારોમાં અત્યંત ભારે વરસાદની સંભાવના છે. નીચાણવાળા વિસ્તારોમાં પાણી ભરાવા તેમજ નદી-નાળાઓમાં જળસ્તર વધવાની શક્યતા હોવાથી સ્થાનિક તંત્રને સતર્ક રહેવા સૂચના આપવામાં આવી છે. 

આ ઉપરાંત અમદાવાદ, ગાંધીનગર, ખેડા, આણંદ, મહિસાગર, અરવલ્લી, સાબરકાંઠા અને ભાવનગર જિલ્લામાં ઓરેન્જ એલર્ટ જાહેર કરવામાં આવ્યું છે. આ જિલ્લાઓમાં ભારે વરસાદ સાથે વીજળીના કડાકા અને 30થી 40 કિમી પ્રતિ કલાકની ઝડપે પવન ફૂંકાવાની શક્યતા છે. હવામાન વિભાગે લોકોને બિનજરૂરી મુસાફરી ટાળવા અને સત્તાવાર સૂચનાઓ પર નજર રાખવા અપીલ કરી છે.