VIDEO: ANDARNI VAAT / ગુવાહાટીમાં આકાશી આફતનો કોપ: સમગ્ર શહેર પાણીમાં ગરકાવ, જનજીવન બેહાલ!

આસામની રાજધાની ગુવાહાટીમાં અવિરત પડી રહેલા મુસળધાર વરસાદે ભારે તબાહી મચાવી છે. સતત વરસી રહેલી આકાશી આફતના કારણે સમગ્ર ગુવાહાટી શહેર જળબંબાકાર થઈ ગયું છે. શહેરના નીચાણવાળા વિસ્તારોથી લઈને મુખ્ય માર્ગો પર ઘૂંટણસમા પાણી ભરાઈ જતાં અસામાન્ય અને ગંભીર પરિસ્થિતિ સર્જાઈ છે. વરસાદી પાણીના નિકાલની યોગ્ય વ્યવસ્થા ન હોવાના કારણે સ્માર્ટ સિટી ગુવાહાટીની દશા અત્યંત વિપરીત અને દયનીય જોવા મળી રહી છે.વરસાદી પાણીનો પ્રકોપ એટલો પ્રચંડ છે કે શહેરના પેટ્રોલ પંપ, રોડ-રસ્તાઓ, દુકાનો અને મકાનો પાણીમાં ગરકાવ થઈ ગયા છે. આ સિવાય મોટા એપાર્ટમેન્ટ, કમર્શિયલ કોમ્પ્લેક્સ અને રેસિડેન્શિયલ વિસ્તારો સહિતની તમામ બિલ્ડિંગો પાણીમાં ડૂબી ગઈ છે. ઘરો અને દુકાનોમાં પાણી ઘૂસી જતાં લોકોનો કિંમતી સામાન પલળીને નષ્ટ થઈ ગયો છે. વેપારીઓ અને રહીશોને આ અચાનક આવેલી હોનારતથી ભારે આર્થિક નુકસાન વેઠવાનો વારો આવ્યો છે. પાણી ભરાઈ જવાના કારણે શહેરનો વાહનવ્યવહાર સંપૂર્ણપણે ખોરવાઈ ગયો છે. મુખ્ય માર્ગો નદીમાં ફેરવાઈ જતાં અનેક વાહનો પાણીમાં બંધ પડી ગયા છે, જેનાથી કલાકો સુધી ટ્રાફિક જામની સ્થિતિ સર્જાઈ છે. સામાન્ય નાગરિકો, નોકરિયાતો અને વાહનચાલકોને અવરજવર કરવામાં ભારે હાલાકીનો સામનો કરવો પડી રહ્યો છે. દૈનિક જરૂરિયાતોની વસ્તુઓ મેળવવા માટે પણ લોકોને પૂર જેવા પાણીમાંથી પસાર થવું પડી રહ્યું છે.

સ્થિતિ વધુ વણસતાં સ્થાનિક પ્રશાસન અને આપત્તિ વ્યવસ્થાપનની ટીમો હરકતમાં આવી છે. અસરગ્રસ્ત વિસ્તારોમાંથી પંપ મારફતે પાણી બહાર કાઢવાના પ્રયાસો હાથ ધરવામાં આવ્યા છે, પરંતુ અવિરત વરસાદને કારણે રાહત કામગીરીમાં મોટા વિઘ્નો આવી રહ્યા છે. હવામાન વિભાગે હજુ પણ ભારે વરસાદની આગાહી કરી હોવાથી તંત્ર દ્વારા લોકોને બિનજરૂરી બહાર ન નીકળવા અને સાવચેત રહેવા અપીલ કરવામાં આવી છે.

બ્યૂરો રિપોર્ટ જીએસટીવી