VIDEO: ANDARNI VAAT / રાજૌરીમાં મુનાવર નદી પર નવનિર્મિત કાલર એન્ડ્રોલા બ્રિજ ક્ષતિગ્રસ્ત!

જમ્મુ-કાશ્મીરના રાજૌરી જિલ્લામાં અવિરત પડી રહેલા મુશળધાર વરસાદને કારણે સ્થિતિ અત્યંત ચિંતાજનક બની છે. પહાડી વિસ્તારોમાંથી વહી આવતા પાણીને પગલે મુનાવર નદીમાં અચાનક આવેલ પ્રચંડ પૂરે નદી કાંઠાના વિસ્તારોમાં ભારે તારાજી સર્જી છે. પૂરના ધસમસતા જળપ્રવાહના તીવ્ર ઘસારાને કારણે મુનાવર નદી પર તાજેતરમાં જ તૈયાર કરવામાં આવેલા નવનિર્મિત કાલર એન્ડ્રોલા બ્રિજના બાજુના ભાગને વ્યાપક નુકસાન પહોંચ્યું છે. પુલનો એક તરફનો પાળિયાનો ભાગ ધસી જતાં આ મુખ્ય માર્ગ પરનો વાહનવ્યવહાર સુરક્ષાના કારણોસર ત્વરિત ધોરણે સ્થગિત કરી દેવામાં આવ્યો છે. નવો બનેલો પુલ ક્ષતિગ્રસ્ત થવાના કારણે આસપાસના અનેક ગામડાઓનો સંપર્ક મુખ્ય શહેરથી કપાઈ ગયો છે, જેના લીધે સ્થાનિક નાગરિકો માટે અવરજવરની મોટી સમસ્યા ઊભી થઈ છે..

પૂરના પ્રચંડ પ્રવાહના કારણે માર્ગો પર વ્યાપક ધોવાણ થતાં સ્થાનિક રહીશો અને વાહનચાલકો અટવાઈ પડ્યા છે. ઘટનાની જાણ થતાં જ જિલ્લા વહીવટી તંત્ર અને માર્ગ-મકાન વિભાગના ઉચ્ચ અધિકારીઓની ટુકડી તાત્કાલિક સ્થળ પર પહોંચી ગઈ હતી. તંત્ર દ્વારા ક્ષતિગ્રસ્ત થયેલા કાલર એન્ડ્રોલા બ્રિજની આસપાસ સુરક્ષા કોર્ડન ઊભું કરી દેવામાં આવ્યું છે જેથી કોઈ અનિચ્છનીય બનાવ ન બને. આ ઉપરાંત, બ્રિજના ક્ષતિગ્રસ્ત ભાગનું ઝડપથી સમારકામ હાથ ધરીને વાહનવ્યવહાર પૂર્વવત કરવા માટે યુદ્ધના ધોરણે કામગીરી શરૂ કરવામાં આવી છે. આપત્તિ વ્યવસ્થાપન વિભાગ દ્વારા સમગ્ર પરિસ્થિતિ પર ચોવીસે કલાક બારીકાઈથી નજર રાખવામાં આવી રહી છે..

બ્યૂરો રિપોર્ટ જીએસટીવી