VIDEO: ANDARNI VAAT / શ્રીનગરમાં મેઘરાજાની મહેર: આકરા તાપ અને બફારામાંથી મળી મોટી રાહત!

જમ્મુ અને કાશ્મીરની ઉનાળુ રાજધાની શ્રીનગરમાં છેલ્લા કેટલાક દિવસોથી અસહ્ય ગરમી અને અકળાવનારા બફારાનો સામનો કરી રહેલા સ્થાનિક નાગરિકો તેમજ પ્રવાસીઓ માટે હવામાનમાં આવેલો અચાનક પલટો મોટી રાહત લઈને આવ્યો છે. શ્રીનગર અને તેની આસપાસના ખીણ વિસ્તારોમાં બપોર બાદ શરૂ થયેલા વરસાદી ઝાપટાંના કારણે વાતાવરણમાં સુંદર આહલાદકતા અને ઠંડક પ્રસરી ગઈ છે.. તાપમાનમાં નોંધપાત્ર ઘટાડો થતાં તાપથી હેરાન થયેલા લોકોને ભારે રાહત અનુભવાઈ છે. આ મોસમી વરસાદના લીધે માર્ગો પરની ધૂળ બેસી ગઈ છે અને સમગ્ર વાતાવરણ શુષ્કમાંથી આહલાદક બની ગયું છે. ઉનાળાના આકરા તાપ વચ્ચે કાળાડિબાંગ વાદળોના આગમન સાથે પડેલા વરસાદે ઘાટીના કુદરતી સૌંદર્યને વધુ નયનરમ્ય અને આકર્ષક બનાવી દીધું છે, જેનાથી પ્રવાસીઓમાં પણ ખાસ ઉત્સાહ જોવા મળી રહ્યો છે..

 

હવામાન વિભાગના જણાવ્યા અનુસાર, વાતાવરણમાં સર્જાયેલી સ્થાનિક સિસ્ટમ અને પવનની દિશામાં ફેરફાર થવાને કારણે આ વરસાદી માહોલ સર્જાયો છે. આ વરસાદ માત્ર તાપમાન ઘટાડવામાં જ મદદરૂપ નથી બન્યો, પરંતુ તેની સકારાત્મક અસર સ્થાનિક કૃષિ, બાગાયત અને સફરજનના બગીચાઓ પર પણ જોવા મળશે. સુકાઈ રહેલા પાક અને બગીચાઓ માટે આ કાલવર્ષા સંજીવની સમાન સાબિત થઈ છે. શ્રીનગરની પ્રખ્યાત ડલ લેક અને તેની આસપાસના વિસ્તારોમાં વરસાદ બાદ વાતાવરણ વધુ મનોહર બની ગયું છે. આગામી સમયમાં પણ હળવાથી મધ્યમ વરસાદી ઝાપટાં પડવાની શક્યતાઓ વ્યક્ત કરવામાં આવી છે, જેનાથી તાપમાન નિયંત્રણમાં રહેશે અને હવામાન પણ ખુશનુમા બનેલું રહેશે..

બ્યૂરો રિપોર્ટ જીએસટીવી