VIDEO: ANDARNI VAAT / મણિપુરમાં ૪૮ કલાકનું બંધ: JFD ના જનરલ સ્ટ્રાઈકથી રાજ્યભરમાં જનજીવન ઠપ્પ!

મણિપુરની રાજધાની ઈમ્ફાલ સહિત સમગ્ર રાજ્યમાં જોઈન્ટ ફ્રન્ટ ફોર ડીલિમિટેશન દ્વારા બોલાવવામાં આવેલા ૪૮ કલાકના જનરલ સ્ટ્રાઈકની વ્યાપક અસર જોવા મળી રહી છે. હડતાળના કારણે રાજ્યભરમાં સામાન્ય જનજીવન સંપૂર્ણપણે ખોરવાઈ ગયું છે. રસ્તાઓ પર વાહનવ્યવહાર ઠપ્પ થઈ ગયો છે અને શૈક્ષણિક સંસ્થાઓ તેમજ વેપારી મથકો બંધ રહ્યા છે, જેના કારણે ચારેય તરફ સન્નાટો છવાયેલો જોવા મળી રહ્યો છે. જેએફડીના પ્રદર્શનકારીઓ અને સભ્યો મણિપુરમાં એનઆરસી લાગુ કરતા પહેલા હાથ ધરવામાં આવનારી વસતિ ગણતરીનો ઉગ્ર વિરોધ કરી રહ્યા છે. પ્રદર્શનકારી જી.ગોલમેઈ અને જેએફડી સભ્ય ચિંથાંગામ્બમના જણાવ્યા મુજબ, તેમની માંગ છે કે સરકાર પહેલા એનઆરસીની પ્રક્રિયા ઝડપથી પૂર્ણ કરે અને ત્યારબાદ જ વસતિ ગણતરી હાથ ધરે.. ડીલિમિટેશન કમિટીના પ્રતિનિધિઓએ પણ પ્રશાસનને અપીલ કરી છે કે તેમની બંધારણીય અને વાજબી ચિંતાઓને ધ્યાનમાં રાખીને નિર્ણય લેવામાં આવે. આ ૪૮ કલાકના બંધના કારણે સામાન્ય નાગરિકો અને રોજમદાર કમાનારાઓને ભારે હાલાકી ભોગવવી પડી રહી છે. વાહન ચાલક મુસુક ખાન જેવા અનેક લોકોએ પોતાનો આક્રોશ અને આપવીતી વ્યક્ત કરતાં જણાવ્યું કે રસ્તાઓ બંધ હોવાના કારણે વાહનવ્યવહાર અટકી ગયો છે, જેનાથી તેમની રોજીરોટી અને આજીવિકા પર ગંભીર સંકટ ઊભું થયું છે. મુસાફરોને એક સ્થળેથી બીજા સ્થળે જવા માટે ભારે મશક્કત કરવી પડી રહી છે.

હડતાળને પગલે ઈમ્ફાલ અને આસપાસના વિસ્તારોમાં અનિચ્છનીય બનાવ ન બને તે માટે સુરક્ષા વ્યવસ્થા અત્યંત કડક કરી દેવામાં આવી છે. સંવેદનશીલ વિસ્તારોમાં વધારાનો પોલીસ કાફલો તૈનાત કરવામાં આવ્યો છે. જેએફડીના વિરોધ પ્રદર્શન વચ્ચે તંત્ર દ્વારા પરિસ્થિતિ પર સતત નજર રાખવામાં આવી રહી છે, જ્યારે સંગઠને પોતાની માંગણીઓ સત્વરે ન સંતોષાય તો આંદોલન વધુ તેજ બનાવવાની ચેતવણી આપી છે.

બ્યૂરો રિપોર્ટ જીએસટીવી