VIDEO: ANDARNI VAAT / ભારત-યુકે ટ્રેડ ડીલથી કાનપુરના લેધર ઉદ્યોગમાં દિવાળી જેવો માહોલ, ૧૬% આયાત ડ્યુટી નાબૂદ!

ઉત્તર પ્રદેશના અગ્રણી ઔદ્યોગિક કેન્દ્ર કાનપુરની લેધર ઇન્ડસ્ટ્રીના નિકાસકારોએ ભારત અને બ્રિટન વચ્ચે તાજેતરમાં થયેલા ઐતિહાસિક મુક્ત વ્યાપાર કરારને ઉત્સાહભેર આવકાર્યો છે. આ મહત્વપૂર્ણ વ્યાપાર કરાર અંતર્ગત બ્રિટનમાં પ્રવેશતા ભારતીય માલસામાન પર લાગતી ૧૬ ટકા જેટલી મોટી આયાત ડ્યુટી સંપૂર્ણપણે નાબૂદ કરવામાં આવી છે.. આ મોટો ટેક્સ ઘટાડો ભારતીય નિકાસને વૈશ્વિક બજારમાં એક નવી ગતિ આપશે, જેનાથી લેધર પ્રોડક્ટ્સ, ફૂટવેર અને અવનવી એસેસરીઝની નિકાસમાં ધરખમ વધારો થશે. આ કરારને પગલે કાનપુરના જાણીતા લેધર નિકાસકારોએ હર્ષ વ્યક્ત કરતાં જણાવ્યું છે કે, આનાથી ભારતીય ચર્મ ઉત્પાદનો બજારમાં ચીન અને ઈટાલી જેવા મજબૂત હરીફ દેશો સામે વધુ સ્પર્ધાત્મક બનશે. ટેક્સ નાબૂદીના કારણે બ્રિટનના આયાતકારો માટે ખર્ચ ઘટશે, જેના લીધે ભારતને હવે મોટા પ્રમાણમાં નવા ઓર્ડર્સ મળવાની આશા સેવાઈ રહી છે..

 

આ ઐતિહાસિક વ્યાપાર સંધિથી ભારતીય અર્થતંત્રમાં એક મોટો આર્થિક ઉછાળો આવવાની સંભાવના છે, જેનાથી દેશની તિજોરીમાં આશરે ૭૦૦ થી ૯૦૦ કરોડનો મોટો ઉમેરો થઈ શકે છે. બ્રિટન તરફથી વિદેશી હૂંડિયામણની આવક વધવાને કારણે આંતરરાષ્ટ્રીય સ્તરે ભારતીય રૂપિયાની સ્થિતિ વધુ મજબૂત બનશે. ભારતભરમાં કાનપુર ઉપરાંત આગ્રા, કોલકાતા, તમિલનાડુ અને દિલ્હી-NCR જેવા ચર્મ ઉદ્યોગના મુખ્ય હબ તરીકે જાણીતા વિસ્તારોને આ ડીલનો સીધો અને મોટો આર્થિક લાભ મળશે. આ કરારથી માત્ર નિકાસ જ નહીં વધે, પરંતુ સ્થાનિક સ્તરે હજારો કામદારો માટે રોજગારીની નવી તકો પણ ઊભી થશે. કાનપુરના ઉદ્યોગપતિઓ આ વ્યાપાર કરારને ભારતીય લેધર સેક્ટરના સુવર્ણ યુગની શરૂઆત તરીકે જોઈ રહ્યા છે. એકંદરે, આ વ્યાપારિક સમજૂતી વૈશ્વિક ફલક પર ભારતીય લેધર ઉદ્યોગને નવી ઊંચાઈઓ પર લઈ જવા માટે માઇલસ્ટોન સાબિત થશે..

બ્યૂરો રિપોર્ટ જીએસટીવી