VIDEO: ANDARNI VAAT / દહેરાદૂન-મસુરી માર્ગ પર ભૂસ્ખલનની આફત વચ્ચે તંત્રની ઝડપી કામગીરી!

ઉત્તરાખંડમાં પડી રહેલા ભારે વરસાદના કારણે દહેરાદૂન-મસુરી મુખ્ય માર્ગ પર ભૂસ્ખલનની ઘટના સામે આવ્યા બાદ તંત્ર દ્વારા હાથ ધરવામાં આવેલી તાકીદની સમારકામ કામગીરી પૂર્ણ કરીને આ રસ્તો હળવા વાહનો માટે ફરી ખુલ્લો મૂકવામાં આવ્યો છે.. સતત વાહનવ્યવહાર અને વરસાદી પાણીના પ્રવાહને લીધે માર્ગને ભારે નુકસાન પહોંચ્યું હતું, જેના કારણે સુરક્ષાના ભાગરૂપે મોટા વાહનોની અવરજવર પર કામચલાઉ રોક લગાવવામાં આવી હતી.. નગરપાલિકા અધ્યક્ષ મીરા સકલાની સહિતના ઉચ્ચ અધિકારીઓ અને સંબંધિત વિભાગો સ્થળ પર સક્રિય રહીને પરિસ્થિતિનું સતત મોનિટરિંગ કરી રહ્યા છે, જેથી સામાન્ય નાગરિકો અને પ્રવાસીઓને કોઈ આફતનો સામનો ન કરવો પડે. હાલમાં વાહનોને સાંકડા રસ્તાઓ પર ડાયવર્ટ કરવામાં આવ્યા હોવાથી ટ્રાફિક જામની સમસ્યા સર્જાઈ છે, પરંતુ સ્થિતિને પહોંચી વળવા માટે પોલીસ અને પ્રશાસન દ્વારા ટ્રાફિકનું સુચારુ સંચાલન કરવામાં આવી રહ્યું છે..

માર્ગ સમારકામ કામગીરી સાથે જોડાયેલા આસિસ્ટન્ટ અરવિંદ સત્વરેના જણાવ્યા મુજબ, રસ્તા પર સતત ચાલુ વાહનવ્યવહારના કારણે રિપેરિંગની કામગીરીમાં મોટા અવરોધો આવી રહ્યા હતા. જેથી સમારકામની પ્રક્રિયા ઝડપી બનાવી શકાય તે માટે થોડા સમય માટે વાહનોની અવરજવર રોકીને રોડનું કામ પૂર્ણ કરવામાં આવ્યું હતું. બે પૈડાં વાળા વાહનચાલકોને પણ અત્યંત સાવચેતીપૂર્વક આગળ વધવા માટે વિશેષ સૂચના આપવામાં આવી છે. રાજ્યના સંબંધિત વિભાગો અને મંત્રીઓ આ પરિસ્થિતિ પર સીધી નજર રાખી રહ્યા છે જેથી પ્રવાસીઓ અને સ્થાનિક રહીશોને કોઈ મુશ્કેલી ન પડે. હવામાન વિભાગની ચેતવણીને પગલે પ્રશાસને લોકોને પહાડી રસ્તાઓ પર મુસાફરી ટાળવા અને વહીવટી તંત્ર દ્વારા જારી કરવામાં આવતી સૂચનાઓનું કડકપણે પાલન કરવા અનુરોધ કર્યો છે..

બ્યૂરો રિપોર્ટ જીએસટીવી