VIDEO: લખનૌના બજારમાં રક્ષાબંધનની રોનક: હીરા અને સોના-ચાંદીની રાખડીઓનો ભારે ક્રેઝ!
છેલ્લું અપડેટ : 25 Aug 2026
ભાઈ-બહેનના પ્રેમ અને પવિત્ર સંબંધના તહેવાર રક્ષાબંધનને હવે ગણતરીના દિવસો જ બાકી રહ્યા છે, ત્યારે ઉત્તર પ્રદેશની રાજધાની લખનૌના બજારોમાં રોનક ધમધમી રહી છે. રક્ષાબંધન પર્વને ઉજવવા માટે બહેનોમાં હાલ ભારે ઉત્સાહ અને આનંદનો માહોલ જોવા મળી રહ્યો છે. આ વર્ષે લખનૌના ઝવેરી બજારમાં ખાસ કરીને ડાયમંડ, સોના અને ચાંદીમાંથી તૈયાર કરવામાં આવેલી ડિઝાઈનર રાખડીઓનું આકર્ષણ જમાવટ કરી રહ્યું છે. બહેનો પોતાના ભાઈ માટે અત્યંત ઉત્સાહપૂર્વક આ કિંમતી અને આકર્ષક રાખડીઓની ખરીદી કરી રહી છે. લખનૌના જ્વેલર્સ માર્કેટમાંથી સામે આવેલા દ્રશ્યોમાં બહેનો ઝવેરીઓની દુકાને પહોંચીને પોતાની પસંદગીની ગોલ્ડ અને સિલ્વર રાખડીઓ ઉત્સાહભેર ખરીદતી નજરે પડી રહી છે. જ્વેલર વિનોદ મહેશ્વરીએ આ અંગે પોતાની પ્રતિક્રિયા આપતાં જણાવ્યું હતું કે, આ વખતે રક્ષાબંધન નિમિત્તે બજારમાં ટ્રેન્ડ બદલાયો છે. લોકો માત્ર ધાગાની રાખડી જ નહીં પરંતુ લાઇફટાઇમ યાદગાર રહે તેવી હીરા, સોના અને ચાંદીના બ્રાસલેટ લૂક ધરાવતી ડિઝાઈનર રાખડીઓ વધુ પસંદ કરી રહ્યા છે, જેથી ભાઈ તેને પર્વ પછી પણ હાથમાં પહેરી રાખડીના સ્મરણને સાચવી શકે.
ગ્રાહકો અને બહેનોએ પણ આ અંગે પોતાના પ્રતિભાવ આપતાં ખુશી વ્યક્ત કરી હતી. બહેનોનું કહેવું છે કે ભાઈ માટે રાખડી એ માત્ર એક દોરો નથી પરંતુ પ્રેમ અને સુરક્ષાનું પ્રતીક છે, તેથી તેઓ પોતાના ભાઈ માટે આ ખાસ ડિઝાઈનર રાખડીઓ ખરીદી રહી છે. બજારમાં ઓમ, સ્વાસ્તિક, તુલસી બ્રાસલેટ અને સિલ્વર કોઈન વાળી વિવિધ રેન્જની રાખડીઓ ઉપલબ્ધ છે, જેને ખરીદવા માટે શોરૂમ પર ગ્રાહકોની ભારે ભીડ જામી રહી છે. તહેવાર નજીક આવતા જ લખનૌનું સમગ્ર બજાર રોશની અને ખરીદીની ચહલપહલથી ગુજી ઉઠ્યું છે. ઝવેરીઓ દ્વારા પણ ગ્રાહકોના ઉત્સાહને ધ્યાનમાં રાખીને અવનવી આકર્ષક ડિઝાઈનો અને બજેટ ફ્રેન્ડલી કિંમતી રાખડીઓનો સ્ટોક ઉપલબ્ધ કરાવવામાં આવ્યો છે. રક્ષાબંધન પૂર્વ સંધ્યાએ જોવા મળતો આ ઉત્સાહ અને રોનક દર્શાવે છે કે આ વખતે રક્ષાબંધનનો તહેવાર બહેનો માટે અત્યંત ખાસ અને યાદગાર બની રહેશે.
બ્યૂરો રિપોર્ટ જીએસટીવી
