VIDEO: છતરપુરમાં ખેડૂતોનો હલ્લાબોલ હજારો ટ્રેક્ટરો સાથે કિસાન સંઘની વિશાળ આક્રોશ રેલી!
છેલ્લું અપડેટ : 21 Sept 2026
છતરપુરમાં ખેડૂતોનો હલ્લાબોલ
હજારો ટ્રેક્ટરો સાથે કિસાન સંઘની વિશાળ આક્રોશ રેલી!
મગફળીની MSP પર ખરીદી અને સર્વેની માંગ
મધ્ય પ્રદેશના છતરપુર જિલ્લામાં ભારતીય કિસાન સંઘના નેતૃત્વ હેઠળ ખેડૂતોએ પોતાની વિવિધ માંગણીઓને લઈને એક વિશાળ ટ્રેક્ટર રેલી યોજીને શક્તિ પ્રદર્શન કર્યું હતું. જિલ્લાના હજારો ખેડૂતો પોતાના ટ્રેક્ટરો સાથે રસ્તા પર ઉતરી આવ્યા હતા, જેના કારણે સમગ્ર શહેરમાં ટ્રેક્ટરોની લાંબી કતારો જોવા મળી હતી. મગફળીની ટેકાના ભાવે ખરીદી કરવા, અતિવૃષ્ટિથી થયેલા પાક નુકસાનીનો તાત્કાલિક સર્વે કરી રાહત આપવા અને કેન-બેતવા લિંક પ્રોજેક્ટનું કામ ઝડપથી પૂર્ણ કરવાની મુખ્ય માંગ સાથે ખેડૂતોએ પ્રશાસનને ઘેરીને આક્રોશ વ્યક્ત કર્યો હતો. ભારતીય કિસાન સંઘના રાજ્ય પ્રમુખ કમલ સિંહ અંજનાએ જણાવ્યું હતું કે, તાજેતરમાં થયેલા ભારે વરસાદ અને અતિવૃષ્ટિના કારણે ખેડૂતોનો ઊભો પાક સંપૂર્ણપણે બરબાદ થઈ ગયો છે. તંત્ર દ્વારા હજુ સુધી ખેતરોમાં યોગ્ય સર્વે કરવામાં આવ્યો નથી, જેનાથી ખેડૂતો આર્થિક સંકટમાં મુકાયા છે. તેમણે માંગ કરી છે કે સરકાર તાત્કાલિક અસરથી નુકસાનીનો સર્વે કરાવીને પીડિત ખેડૂતોને યોગ્ય મુઆવજો ચુકવે અને મગફળી ઉત્પાદક ખેડૂતોને આર્થિક પાયમાલીથી બચાવવા માટે સરકારી સેન્ટરો પર એમએસપી ભાવે ખરીદી પ્રક્રિયા શરૂ કરે.
ભારે વરસાદથી બરબાદ થયેલા પાકના વળતર માટે આંદોલન!
માંગણીઓ પૂરી નહીં થાય તો ઉગ્ર આંદોલનની ચેતવણી!
આ ઉપરાંત, કિસાન નેતાઓએ બુંદેલખંડ ક્ષેત્ર માટે અતિ મહત્વકાંક્ષી ગણાતા કેન-બેતવા લિંક પ્રોજેક્ટની ધીમી ગતિ સામે પણ ભારે અસંતોષ વ્યક્ત કર્યો હતો. તેમણે ભારપૂર્વક જણાવ્યું કે આ પ્રોજેક્ટ વહેલી તકે પૂર્ણ કરવામાં આવે જેથી વિસ્તારના ખેડૂતોને સિંચાઈ માટે પૂરતું પાણી મળી રહે અને બુંદેલખંડમાંથી કાયમી ધોરણે દુષ્કાળ તથા પાણીની અછતની સમસ્યાનો અંત આવી શકે. છતરપુરના માર્ગો પરથી સામે આવેલા દ્રશ્યોમાં સેંકડો ટ્રેક્ટરોનો કાફલો અને ખેડૂતોનો વિરોધ પ્રદર્શન સ્પષ્ટપણે જોઈ શકાય છે. કિસાન સંઘે તંત્રને સ્પષ્ટ ચેતવણી આપી છે કે જો તેમની વાજબી માંગણીઓ પર વહેલી તકે સકારાત્મક નિર્ણય લેવામાં નહીં આવે, તો આગામી દિવસોમાં આંદોલનને વધુ તીવ્ર બનાવવામાં આવશે.
બ્યૂરો રિપોર્ટ જીએસટીવી
