VIDEO: કાનપુરમાં ગંગા નદીનો મહાપ્રકોપ નરોરા ડેમમાંથી પાણી છોડાતાં જળસ્તરમાં ભયજનક વધારો!
છેલ્લું અપડેટ : 09 Sept 2026
કાનપુરમાં ગંગા નદીનો મહાપ્રકોપ
નરોરા ડેમમાંથી પાણી છોડાતાં જળસ્તરમાં ભયજનક વધારો!
અનેક વિસ્તારોમાં પૂરના પાણી ઘૂસતાં હજારો લોકો બેઘર!
ઉત્તર પ્રદેશના કાનપુર શહેરમાંથી પસાર થતી પવિત્ર ગંગા નદીના જળસ્તરમાં અવિરત વધારો થતાં તટીય વિસ્તારોમાં ભયંકર જળસંકટ ઊભું થયું છે. પહાડી અને મેદાની વિસ્તારોમાં પડેલા ભારે વરસાદ બાદ ઉપરવાસમાં આવેલા નરોરા ડેમમાંથી લાખો ક્યુસેક પાણી છોડવામાં આવ્યું છે. આ વધારાના પાણીનો જથ્થો ગંગા નદીમાં ઠલવાતાં કાનપુર નજીક નદીનું જળસ્તર ભયજનક સપાટીની અત્યંત નજીક પહોંચી ગયું છે, જેના કારણે નીચાણવાળા વિસ્તારોમાં પૂરના પાણી ઘૂસવાનું શરૂ થઈ ચૂક્યું છે. નરોરા ડેમમાંથી સતત પાણી છોડાવાના લીધે કાનપુરના ગંગા ઘાટ, આસપાસના ગ્રામીણ વિસ્તારો અને તટીય વસાહતોમાં પૂરનો પ્રકોપ જોવા મળી રહ્યો છે. નદી કિનારે આવેલા દસથી વધુ ગામડાંઓ પાણીમાં ગરકાવ થઈ જતાં હજારો નાગરિકોની મુશ્કેલીમાં મોટા પાયે વધારો થયો છે. ખેતરો જળમગ્ન બની જતાં ઊભો પાક નષ્ટ થવાના આરે છે, જ્યારે લોકો ઘરબાર છોડીને પોતાના કિંમતી સામાન સાથે સલામત અને ઊંચા સ્થળોએ સ્થળાંતર કરવા મજબૂર બન્યા છે.
ખેતરો તળાવમાં ફેરવાયા, પાક નષ્ટ થતાં ખેડૂતો થયા પાયમાલ!
પૂરના પ્રકોપથી જનજીવન સંપૂર્ણપણે અસ્તવ્યસ્ત
ગ્રાઉન્ડ ઝીરો પરથી મળેલા દ્રશ્યોમાં ચારેય તરફ પાણી જ પાણી નજરે પડી રહ્યું છે, જેના કારણે માર્ગ વ્યવહાર ખોરવાઈ ગયો છે. સ્થાનિક રહીશોએ પોતાનો આક્રોશ અને વ્યથા ઠાલવતાં જણાવ્યું કે દર વર્ષે પૂરના લીધે તેમની આજીવિકા છીનવાઈ જાય છે પરંતુ તંત્ર તરફથી કાયમી ઉકેલ લાવવામાં આવતો નથી. પૂરના વધતા પાણીના લીધે રોગચાળો ફેલાવાની અને પીવાના શુદ્ધ પાણીની વિકટ અછત સર્જાવાની ભીતિ ખેડૂતો અને તટીય વિસ્તારના લોકોને સતાવી રહી છે. પરિસ્થિતિની ગંભીરતાને ધ્યાનમાં રાખીને સ્થળ પર તૈનાત સ્થાનિક પ્રશાસન અને સિંચાઈ વિભાગની ટીમો દ્વારા નદીની નીચાણવાળી સપાટી પર સતત મોનિટરિંગ કરવામાં આવી રહ્યું છે. પૂર પ્રભાવિત વિસ્તારોમાંથી લોકોને સુરક્ષિત રીતે બહાર કાઢવા માટે હોડીઓ અને રેસ્ક્યૂ ટુકડીઓને તૈનાત કરી દેવામાં આવી છે. જોકે ઉપરવાસમાંથી હજુ પણ વધુ પાણી છોડાવાની શક્યતા હોવાથી કાનપુર સત્તાધીશો દ્વારા નદીકાંઠાના તમામ ગામોને હાઈ એલર્ટ પર રાખીને સાવચેત રહેવાની સૂચના આપવામાં આવી છે.
બ્યૂરો રિપોર્ટ જીએસટીવી
