VIDEO: કેરળના કન્નૂરમાં આફતનો વરસાદ: કોટ્ટિયૂર-બોયઝ ટાઉન રોડ પર ભેખડો ધસતાં ટ્રાફિક ઠપ્પ!
છેલ્લું અપડેટ : 25 Aug 2026
કેરળના કન્નૂર જિલ્લામાં ભારે વરસાદને પગલે ભેખડો ધસી પડવાની બે અલગ-અલગ ઘટનાઓ સામે આવતાં વાહનવ્યવહાર અને જનજીવન પર ગંભીર અસર પડી ચૂકી છે. સતત વરસી રહેલા મુસળધાર વરસાદના કારણે કન્નૂરના કોટ્ટિયૂર-બોયઝ ટાઉન રોડ પર મોટો લેન્ડસ્લાઈડ થયો છે. જમીન ધસી પડવાના કારણે પહાડી પરથી મોટો કાટમાળ રસ્તા પર આવી જતાં આ મુખ્ય માર્ગ પરનો વાહનવ્યવહાર સંપૂર્ણપણે ખોરવાઈ ગયો છે. કોટ્ટિયૂર-બોયઝ ટાઉન રોડ પર ઘટેલી ઘટના બાદ પબ્લિક રિલેશન્સ ડિપાર્ટમેન્ટ દ્વારા જાહેર કરવામાં આવેલા દ્રશ્યોમાં રોડ પર પથરાયેલો વિશાળ કાટમાળ અને કાદવ જોઈ શકાય છે. ઘટના બનતાં જ તંત્ર દ્વારા કાટમાળ હટાવવાની કામગીરી આક્રમક રીતે હાથ ધરવામાં આવી છે. મુસાફરો અને વાહનચાલકોની સુરક્ષાને ધ્યાનમાં રાખીને વહીવટી તંત્ર દ્વારા આ માર્ગ પરથી પસાર થતાં લોકોને વૈકલ્પિક રસ્તાઓનો ઉપયોગ કરવા માટે ખાસ સૂચના અને એડવાઈઝરી જારી કરવામાં આવી છે..
બીજી તરફ, કન્નૂરના ઈલાયવૂર વિસ્તારમાં આવેલા નેશનલ હાઈવે નિર્માણ ક્ષેત્રમાં પણ અતિભારે વરસાદના કારણે લેન્ડસ્લાઈડની અન્ય એક ઘટના ઘટી છે. હાઈવે કન્સ્ટ્રક્શન સાઈટ પર કાચી માટી અને ખડકો ધસી પડતાં બાંધકામ સ્થળે અફરાતફરી મચી ગઈ હતી. હાઈવે નિર્માણનું કામ ચાલી રહ્યું હતું તેવા સમયે જ ભેખડ ધસી પડતાં નેશનલ હાઈવેના કામકાજ તેમજ વાહન વ્યવહારને પણ ક્ષણિક અસર પહોંચી છે. હવામાન વિભાગ દ્વારા કેરળ અને ખાસ કરીને કન્નૂર પહાડી વિસ્તારોમાં હજુ પણ ભારે વરસાદની શક્યતા વ્યક્ત કરવામાં આવી છે. બંને સ્થળોએ તંત્ર દ્વારા જેસીબી અને જેવી ભારે મશીનરીઓ મૂકીને યુદ્ધના ધોરણે રસ્તો સાફ કરવાની કામગીરી ચાલી રહી છે. કન્નૂર વહીવટી તંત્ર પરિસ્થિતિ પર સતત નજર રાખી રહ્યું છે અને ભૂસ્ખલનની સંભાવના ધરાવતા વિસ્તારોના લોકોને સતર્ક રહેવાની અપીલ કરી રહ્યું છે.
બ્યૂરો રિપોર્ટ જીએસટીવી
