સૈફ અલી ખાનની સફળ સર્જરી, ICUમાં ખસેડવામાં આવ્યો; ડોક્ટરોએ આપ્યું હેલ્થ અપડેટ

ગુરુવારે વહેલી સવારે અભિનેતા સૈફ અલી ખાન પર હુમલો થયો હતો. અજાણ્યા વ્યક્તિએ ઘરમાં ઘૂસીને તેના પર હુમલો કર્યો. તેણે સૈફને છ વાર ચાકુ માર્યું, જેમાંથી બે વાર ઊંડા હતા. ઘટના બાદ સૈફને લીલાવતી હોસ્પિટલમાં દાખલ કરવામાં આવ્યો છે. ડોક્ટરોની એક ટીમ તેમની સારવાર કરી રહી છે.

લીલાવતી હોસ્પિટલે બોલિવૂડ અભિનેતા સૈફ અલી ખાનના સ્વાસ્થ્ય અંગે અપડેટ આપ્યું છે. હોસ્પિટલે કહ્યું છે કે સૈફને ઓપરેશન થિયેટરમાંથી ICUમાં ખસેડવામાં આવ્યો છે. તેને બે ગંભીર ઈજાઓ થઈ હતી. ન્યુરો સર્જરી થઈ ગઈ છે. સૈફની હાલત સારી છે અને તે સ્વસ્થ થઈ રહ્યો છે. સૈફના શરીરની અંદર છરીનો ટુકડો હતો, જેને કાઢી નાખવામાં આવ્યો છે. છરીનો અઢી ઇંચનો ટુકડો કરોડરજ્જુમાં હતો.

કાંડા અને ગરદનમાં ઊંડી ઈજા

સૂત્રો પાસેથી મળતી માહિતી અનુસાર, આ ઘટનામાં સૈફને કમરના ભાગે છરીથી ઘા મારવામાં આવ્યા હતા અને આ ઘા તેની કરોડરજ્જુની ખૂબ નજીક છે. આ જ કારણ છે કે ડોક્ટરો આ સર્જરીને લઈને થોડા સાવધ હતા. લીલાવતી હોસ્પિટલમાં, ડૉ. નિરજ ઉત્તમાણી, ડૉ. નીતિન ડાંગે અને ડૉ. લીલા જૈનની ટીમે મળીને સૈફની સર્જરી કરી હતી. 

પ્લાસ્ટિક સર્જરી પણ કરવામાં આવશે

લીલાવતી હોસ્પિટલના સીઓઓએ જણાવ્યું હતું કે સૈફને રાત્રે 3.30 વાગ્યે દાખલ કરવામાં આવ્યો હતો અને તેની સર્જરી લગભગ અઢી કલાક સુધી ચાલી હતી. ન્યુરો સ્પેશિયાલિસ્ટની દેખરેખ હેઠળ કરવામાં આવેલી આ સર્જરી બાદ સૈફની પ્લાસ્ટિક સર્જરી પણ કરવામાં આવશે. ડૉ.લીના જૈન સૈફની પ્લાસ્ટિક સર્જરી કરશે. સૈફને કાંડા અને કમર ઉપરાંત ગળામાં પણ ઊંડો ઘા વાગ્યો છે.

હાલમાં સૈફની સર્જરી થઈ છે અને તેને અંડર ઓબ્ઝર્વેશન ICUમાં રાખવામાં આવ્યો છે. ડૉક્ટરોની પરવાનગી બાદ પોલીસ સૈફ અલી ખાનનું નિવેદન નોંધશે, ત્યારપછી જ બાબતો વધુ સ્પષ્ટ થશે. હાલ પોલીસ સૈફના ઘરના સીસીટીવી ફૂટેજને સ્કેન કરી રહી છે. તેમજ આ મામલે વધુ તપાસ કરી રહી છે. 

અભિનેતા ખતરામાંથી બહાર છે.

અભિનેતાના ડોક્ટરે એક નિવેદન બહાર પાડીને કહ્યું છે કે તેમને કુલ છ ઈજાઓ થઈ છે, જેમાંથી એક ઊંડી ઈજા કરોડરજ્જુની નજીક છે. સૈફ હાલમાં લીલાવતી હોસ્પિટલમાં દાખલ છે. અહેવાલો અનુસાર, સૈફના મોટા દીકરા ઇબ્રાહિમ અલી ખાને તેમને હોસ્પિટલમાં દાખલ કર્યા હતા.

સૈફ અલી ખાનની ટીમે પણ તેમના સ્વાસ્થ્ય અંગે સત્તાવાર નિવેદન જારી કર્યું છે. ટીમે કહ્યું છે કે સૈફ અલી ખાન ખતરામાંથી બહાર છે. હાલમાં તેમની તબિયત સારી છે અને ડોકટરો તેમની પ્રગતિ પર નજર રાખી રહ્યા છે. પરિવારના બધા સભ્યો સુરક્ષિત છે અને પોલીસ ઘટનાની તપાસ કરી રહી છે.

સારા અને ઇબ્રાહિમ હોસ્પિટલ પહોંચ્યા

અભિનેતાની ટીમના નિવેદનમાં એ પણ પુષ્ટિ મળી છે કે કરીના કપૂર ખાન અને બાળકો તૈમૂર અને જેહ સુરક્ષિત છે. દરમિયાન, હવે ગઈકાલે રાતનો કરીનાનો એક વીડિયો વાયરલ થયો છે. અભિનેત્રી પાયજામામાં છે. તે ઘરે સ્ટાફ સાથે વાત કરી રહી છે. અહેવાલો અનુસાર, તેમના ઘરમાં રહેતા એક ઘરના સહાયકે એક અજાણી વ્યક્તિને ઘરમાં પ્રવેશતા જોયો. તે જ સમયે, તેમના પિતા પર હુમલા બાદ, સારા અલી ખાન અને ઇબ્રાહિમ અલી ખાન પણ તાત્કાલિક લીલાવતી હોસ્પિટલ પહોંચ્યા, જેની તસવીરો ઝડપથી વાયરલ થઈ રહી છે.

રાત્રે 2 વાગ્યે બની ઘટના

આ ઘટના બની ત્યારે સૈફ અલી ખાન સૂઈ રહ્યો હતો. રાત્રે લગભગ 2 વાગ્યાની આસપાસ, સૈફે સહાયકના રૂમમાંથી કેટલાક અવાજો સાંભળ્યા અને તે ત્યાં દોડી ગયો. ત્યાં એક માણસ ફિલિપ્સ ઉર્ફે લીમા સાથે ઝઘડો કરી રહ્યો હતો. જ્યારે સૈફ બહાર આવ્યો અને જોવા લાગ્યો કે હંગામો શું છે, ત્યારે ચોર અને સૈફ વચ્ચે ઝઘડો થયો. આ કારણે તેણે અભિનેતાને છરી મારી દીધી.