સૈફ અલી ખાન પર 6 વખત છરીથી થયો હુમલો, ઊંડા ઘા વાગ્યા, અઢી કલાક ચાલી સર્જરી, ડોક્ટરે આપી માહિતી

બોલિવૂડ અભિનેતા સૈફ અલી ખાન પર છરીથી હુમલો કરવામાં આવ્યો છે. આ પછી તેમને લીલાવતી હોસ્પિટલમાં દાખલ કરવામાં આવ્યા. ઘરમાં ઘૂસેલા ચોરે તેના પર છરી વડે હુમલો કર્યો.

બુધવારે રાત્રે લગભગ 2:30 વાગ્યે બોલિવૂડ અભિનેતા સૈફ અલી ખાન અને અભિનેત્રી કરીના કપૂરના બાંદ્રા વેસ્ટ સ્થિત ઘરમાં મોટી ચોરી થઈ હતી. ચોરી દરમિયાન સૈફ અલી ખાન પર પણ છરીથી હુમલો કરવામાં આવ્યો હતો. પોલીસે જણાવ્યું કે સૈફ અલી ખાનને લીલાવતી હોસ્પિટલમાં દાખલ કરવામાં આવ્યો છે, જ્યાં તેની સારવાર ચાલી રહી છે. સૂત્રોએ જણાવ્યું હતું કે તેમને સામાન્ય ઈજાઓ થઈ હતી. હજુ સુધી એ સ્પષ્ટ નથી કે તેને પહેલા છરી વાગી હતી કે ચોર સાથેની ઝપાઝપીમાં તે ઘાયલ થયો હતો. મુંબઈ પોલીસ અને ક્રાઈમ બ્રાન્ચ બંને આ મામલાની તપાસ કરી રહ્યા છે.

નોકરો અને ઘરના કેટલાક સભ્યો સૈફને હોસ્પિટલ લઈ ગયા. તેને દાખલ કરવામાં આવ્યો. રાહતની વાત એ છે કે સૈફની ઈજા ગંભીર નથી.

લીલાવતી હોસ્પિટલના સીઓઓ ડૉ. નીરજ ઉત્તમણીએ જણાવ્યું હતું કે સૈફ અલી ખાનને તેમના બાંદ્રા નિવાસસ્થાને એક અજાણ્યા વ્યક્તિએ છરી મારી હતી અને તેમને સવારે 3.30 વાગ્યે હોસ્પિટલમાં લાવવામાં આવ્યા હતા. ઉત્તમણીએ કહ્યું કે સૈફ પર છ ઘા હતા અને બે ઊંડા ઘા હતા. આમાંથી એક કરોડરજ્જુની નજીક છે. ન્યુરોસર્જન ડૉ. નીતિન ડાંગે, કોસ્મેટિક સર્જન ડૉ. લીના જૈન, એનેસ્થેસિયોલોજિસ્ટ ડૉ. નિશા ગાંધી, ડૉ. ઉત્તમણીના નેતૃત્વમાં ડૉક્ટરોની એક ટીમ તેમના પર ઓપરેશન કરી રહી હતી. જે આશરે અઢી કલાક ચાલ્યું હતું. 

કરીના અને બાળકો સુરક્ષિત છે

સૈફની પત્ની અને અભિનેત્રી કરીના કપૂર અને તેમના બાળકો સુરક્ષિત છે. પરિવારે હજુ સુધી આ ઘટના અંગે કોઈ સત્તાવાર નિવેદન આપ્યું નથી. ઘટના બાદ ચોર ફરાર છે. મુંબઈ પોલીસ અને ક્રાઈમ બ્રાન્ચની ટીમ તેને પકડવામાં વ્યસ્ત છે. ઘરની આસપાસ લગાવેલા સીસીટીવી ફૂટેજની તપાસ કરવામાં આવી રહી છે.