VIDEO: 'મિર્ઝાપુર ધ ફિલ્મ'નું અમેઝિંગ ટીઝર રિલીઝ, ફરી જોવા મળ્યો ગુડ્ડુ પંડિત-મુન્ના ભૈયાનો સ્વેગ
છેલ્લું અપડેટ : 28 Oct 2024
એમેઝોન પ્રાઇમની વેબ સીરિઝ 'મિર્ઝાપુર' OTT પર હિટ રહી હતી. તેની ત્રણ સિઝન આવી ગઈ છે અને તેને તમામ દર્શકો તરફથી ઘણો પ્રેમ મળ્યો છે. અલી ફઝલ, પંકજ ત્રિપાઠી, દિવ્યેન્દુ શર્મા સહિતના સ્ટાર્સથી સજ્જ આ સીરિઝ દર્શકોની ફેવરિટ સીરિઝ છે. આવી સ્થિતિમાં ઘણા સમયથી ચર્ચા ચાલી રહી છે કે, મેકર્સ આ સીરિઝને ફિલ્મનો આકાર આપી શકે છે, જે હવે સ્પષ્ટ થઈ ગયું છે. તે એક ફિલ્મના રૂપમાં મોટા પડદે હિટ થવા જઈ રહી છે, જેમાં ફરી એક વાર આપણને કાલિન ભૈયા, મુન્ના ભૈયા અને ગુડ્ડુ પંડિત પડદા પર જોવા મળશે. આ ફિલ્મનું ટાઇટલ ‘મિર્ઝાપુર ધ ફિલ્મ’ રાખવામાં આવ્યું છે.
'મિર્ઝાપુર ધ ફિલ્મ'ને લઈને ઓફિશિયલ એનાઉન્સમેન્ટ કરવામાં આવી છે અને તેની પહેલી ઝલક પણ બતાવવામાં આવી છે. એક્સેલ મૂવીઝે આ ફિલ્મનું ટીઝર સોશિયલ મીડિયા પર શેર કર્યું છે. આમાં કાલિન ભૈયા, ગુડ્ડુ પંડિત અને મુન્ના ભૈયાના જબરદસ્ત એક્સપ્રેશન્સ જોઈ શકાય છે. આમાં સૌ પ્રથમ પંકજ ત્રિપાઠી કાલિન ભૈયાના રોલમાં જોવા મળે છે, જે સિંહાસનના મહત્ત્વ, સન્માન અને શક્તિ વિશે વાત કરે છે. પછી અલી ફઝલ ગુડ્ડુ પંડિતના રોલમાં આવે છે અને કહે છે, 'રિસ્ક લેવું એ અમારી યુએસપી છે.' તે રમતને બદલવાની વાત પણ કરે છે કે, હવે મિર્ઝાપુર કોઈ પાસે નહીં આવે પણ બધાને મિર્ઝાપુર આવવું પડશે.
મુન્ના ભૈયા અને કમ્પાઉન્ડરની પણ થઈ એન્ટ્રી
આ પછી મુન્ના ભૈયા એટલે કે દિવ્યેન્દુ શર્માની એન્ટ્રી થાય છે અને તે કહે છે, 'હિન્દી ફિલ્મો કે હીરો હોતે હૈ બે. બોલે થે ના હમ અમર હૈ.' પછી અંતે અભિષેક બેનરજી એટલે કે 'મિર્ઝાપુર'ના કમ્પાઉન્ડરની એન્ટ્રી થાય છે. તે બધા પોતપોતાની ભૂમિકામાં અદભૂત દેખાઈ રહ્યા છે. આવી સ્થિતિમાં, વેબ સીરિઝ પછી, આ બધા પાત્રોને ફરી એકવાર ફિલ્મમાં જોવાનું રસપ્રદ રહેશે.
ક્યારે રિલીઝ થશે 'મિર્ઝાપુર ધ ફિલ્મ'?
'મિર્ઝાપુર ધ ફિલ્મ'નું ટીઝર શેર કરવાની સાથે કેપ્શન પણ લખવામાં આવ્યું છે કે, 'અબ ભૌકાલ ભી બડા હોગા ઔર પર્દા ભી. ‘મિર્ઝાપુર ધ ફિલ્મ’ જલ્દી આ રહી હૈ.' ફેન્સ તેના રિલીઝ અને ટ્રેલરની રાહ જોવા લાગ્યા છે. ફિલ્મની રિલીઝની વાત કરીએ તો ટીઝરમાં માહિતી શેર કરવામાં આવી છે કે તે 2026માં થિયેટરમાં રિલીઝ થશે.
