ફેસ્ટિવ સિઝનમાં બંપર કમાણી માટે તૈયાર રાખો રૂપિયા, દિવાળી પહેલા આવી રહ્યો છે દેશનો સૌથી મોટો IPO

વર્ષ 2024 માત્ર શેરબજાર માટે જ નહીં પરંતુ IPO માર્કેટ માટે પણ શાનદાર સાબિત થઈ રહ્યું છે. મોટી કંપનીઓના ઇશ્યુ સતત રોકાણકારોને કમાણી કરાવે છે અને હવે દેશના ઈતિહાસનો સૌથી મોટો IPO પણ લોન્ચ થવાની તૈયારીમાં છે અને એવી અપેક્ષા રાખવામાં આવે છે કે, આ દિવાળી પહેલા પણ Hyundai Motors India IPO રજૂ કરી શકે છે. તેની સાઇઝ 25,000 કરોડ રૂપિયા હશે.

14 ઓક્ટોબરે લોન્ચ થઈ શકે છે IPO!

જો તમે IPOમાં રોકાણ કરવા માગો છો અને અત્યાર સુધી IPOમાં રોકાણ કરીને કમાણી કરવાનું ચૂકી ગયા છો, તો તમને તહેવારોથી ભરેલા ઓક્ટોબર મહિનામાં એક મોટી તક મળવાની છે. એક અહેવાલ મુજબ, હ્યુન્ડાઈ મોટર ઈન્ડિયા આ દિવાળી પહેલા 14 ઓક્ટોબરે તેનો રૂ. 25,000 કરોડનો IPO લોન્ચ કરી શકે છે. ઉલ્લેખનીય છે કે, દેશમાં દિવાળીની ઉજવણી 29 ઓક્ટોબરથી 3 નવેમ્બર સુધી ચાલુ રહેશે. દક્ષિણ કોરિયાની ઓટોમોબાઈલ કંપની હ્યુન્ડાઈના ભારતીય યુનિટ હ્યુન્ડાઈ મોટર્સ ઈન્ડિયા લિમિટેડના આ આઈપીઓના લોન્ચ સાથે, એલઆઈસીનો રેકોર્ડ તૂટી જશે.

LIC કરતા મોટો હશે હ્યુન્ડાઈનો ઈશ્યુ

અત્યાર સુધી દેશના સૌથી મોટા IPOનો રેકોર્ડ સૌથી મોટી જીવન વીમા કંપની LICના નામે હતો. LICના IPOનું કદ રૂ. 21,000 કરોડ રૂપિયા હતું, પરંતુ આ રેકોર્ડ ઓક્ટોબર મહિનામાં તૂટી જવાનો છે અને Hyundaiના ઇશ્યુનું કદ આના કરતાં રૂ. 4,000 કરોડ રૂપિયા વધુ હશે. ગયા જૂનમાં કંપનીએ ડ્રાફ્ટ રેડ હેરિંગ પ્રોસ્પેક્ટસ (DRHP) ફાઇલ કર્યો હતો અને તેમાં હ્યુન્ડાઇ મોટર ઇન્ડિયાએ IPO હેઠળ 1,42,194,700 ઇક્વિટી શેરના વેચાણ માટે ઓફર કરી હતી.

નવા શેર જારી નહીં કરે કંપની

જો આપણે હ્યુન્ડાઈ મોટર્સ ઈન્ડિયાના IPO અંગેના અહેવાલો જોઈએ, તો સેબીમાં સબમિટ કરાયેલા ડ્રાફ્ટ રેડ હિયરિંગ પ્રોસ્પેક્ટસ (DRHP) મુજબ, હ્યુન્ડાઈ મોટર નવા શેર જારી કરશે નહીં. દક્ષિણ કોરિયન મૂળની કંપની 'ઓફર ફોર સેલ' દ્વારા રિટેલ અને અન્ય રોકાણકારોને સંપૂર્ણ માલિકીના એકમમાં તેના હિસ્સાનો એક ભાગ વેચશે, એટલે કે હ્યુન્ડાઇ મોટર્સનો IPO સંપૂર્ણપણે OFS ઇશ્યૂ હશે. આ અંતર્ગત પ્રમોટર્સ રૂ. 10ની ફેસ વેલ્યુ પર શેર વેચશે.

2003 પછી આવી રહ્યો છે કોઈ ઓટો કંપનીનો IPO 

પેસેન્જર વાહનોના વેચાણની માત્રાના આધારે, હ્યુન્ડાઇ મોટર્સ ઇન્ડિયા કંપની નાણાકીય વર્ષ 2024માં મારુતિ સુઝુકી પછી દેશની બીજી સૌથી મોટી કંપની છે. મારુતિ સુઝુકીનું માર્કેટ કેપ લગભગ $48 બિલિયન છે. મારુતિ સુઝુકીનો IPO 2003માં આવ્યો હતો. આવી સ્થિતિમાં 21 વર્ષ બાદ ભારતમાં કોઈ ઓટો નિર્માતા કંપનીનો IPO આવી રહ્યો છે અને તેનું કદ દેશમાં અત્યાર સુધીના સૌથી મોટા આઈપીઓ કરતા પણ વધારે છે. હ્યુન્ડાઈ મોટર ઈન્ડિયા IPO દ્વારા 18થી 20 બિલિયન ડોલરની વચ્ચે વેલ્યુએશન હાંસલ કરવાનું લક્ષ્ય ધરાવે છે.

17.5% હિસ્સો વેચી શકે છે કંપની

અમેરિકા અને દક્ષિણ કોરિયા પછી હ્યુન્ડાઈ ભારતમાં સૌથી વધુ આવક પેદા કરે છે. આ કંપની IPO લાવીને કેપિટલાઇઝેશન વધારી શકે છે. ઉપરાંત, તે બજારમાં તેની ક્ષમતા ઝડપથી વધારી શકે છે. DHRP અનુસાર, કોરિયન કંપની Hyundai Motor India Limitedમાં તેનો 17.5 ટકા હિસ્સો વેચી શકે છે. હ્યુન્ડાઈએ કોટક મહિન્દ્રા, સિટીબેંક, મોર્ગન સ્ટેનલી, જેપી મોર્ગન અને એચએસબીસી જેવી ઈન્વેસ્ટમેન્ટ બેન્કોને જાહેર બજારમાં પ્રવેશને સરળ બનાવવા અને તેને સફળ બનાવવા માટે જોડ્યા છે. સેબીની મંજૂરી બાદ હવે કંપની ટૂંક સમયમાં હ્યુન્ડાઈ IPOની પ્રાઇસ બેન્ડ અને અન્ય વિગતો શેર કરી શકે છે.