₹ 20 વાર્ષિક પ્રીમિયમ પર ₹ 2,00,000 સુધીનો મળશે લાભ, સરકારની આવી છે વિશેષ યોજના

ભારત સરકારની પ્રધાનમંત્રી સુરક્ષા વીમા યોજના દેશના સામાન્ય લોકો માટે એક વિશેષ વીમા યોજના છે. આ યોજના એક વર્ષ માટે વ્યક્તિગત અકસ્માત વીમા યોજના છે, જે દર વર્ષે રિન્યૂ કરી શકાય છે. તે અકસ્માતને કારણે મૃત્યુ અથવા અપંગતા સામે નાણાકીય રક્ષણ પૂરું પાડે છે. અહીં અકસ્માતનો અર્થ થાય છે બાહ્ય કારણો, હિંસા અને દૃશ્યમાન માધ્યમોથી થતી અચાનક, અણધારી અને અનૈચ્છિક ઘટના. સૌથી મહત્ત્વની વાત એ છે કે આ સ્કીમ માત્ર 20 રૂપિયાના વાર્ષિક પ્રીમિયમ પર ઉપલબ્ધ છે.

PMSBY માટે કોણ અરજી કરી શકે છે?

દરેક ભારતીય કે જેનું બેંક/પોસ્ટ ઓફિસમાં સિંગલ અથવા સંયુક્ત ખાતું છે અને તેની ઉંમર 18 થી 70 વર્ષની વચ્ચે છે તે આ યોજનામાં જોડાવા માટે પાત્ર છે. જો કોઈ વ્યક્તિના એક અથવા અલગ બેંક/પોસ્ટ ઓફિસમાં બહુવિધ ખાતા હોય, તો તે વ્યક્તિ માત્ર એક બેંક/પોસ્ટ ઓફિસ ખાતા દ્વારા યોજનામાં જોડાવા માટે પાત્ર છે. સંયુક્ત ખાતાના કિસ્સામાં, ઉપરોક્ત ખાતાના તમામ ધારકો આ યોજનામાં જોડાઈ શકે છે, જો તેઓ તેના પાત્રતાના માપદંડોને પૂર્ણ કરે અને ઓટો-ડેબિટ દ્વારા પ્રતિ વ્યક્તિ વાર્ષિક રૂ. 20ના દરે પ્રીમિયમ ચૂકવે. ઉપરાંત, ભારતમાં સ્થિત કોઈપણ બેંક શાખામાં યોગ્ય બેંક ખાતું જાળવનાર કોઈપણ NRI પણ આ ખાતા દ્વારા PMSBY કવર મેળવવા માટે પાત્ર છે, જો તે યોજના સાથે સંબંધિત નિયમો અને શરતોને પૂર્ણ કરે.

ક્યારે અને કેટલું કવર ઉપલબ્ધ છે

પ્રધાનમંત્રી સુરક્ષા વીમા યોજના હેઠળ, જો ગ્રાહકનું અકસ્માતમાં મૃત્યુ થાય છે, તો તેના નોમિની અથવા પરિવારના સભ્યને 2 લાખ રૂપિયાનો લાભ મળે છે. આ ઉપરાંત, નિયમ મુજબ, અકસ્માતના કિસ્સામાં, બંને આંખોને સંપૂર્ણ અને ભરપાઈ ન કરી શકાય તેવું નુકસાન અથવા બંને હાથ અથવા પગમા ખોટ અથવા એક આંખની દ્રષ્ટિ ગુમાવવી અને હાથ અથવા પગની ખોડમાં રૂ. 2 લાખનો લાભ મળે છે. આ ઉપરાંત, જો અકસ્માતથી એક આંખની દ્રષ્ટિનું સંપૂર્ણ અને ન ભરી શકાય તેવું નુકસાન થાય અથવા એક હાથ અથવા પગનો ઉપયોગ ખોવાઈ જાય, તો 1 લાખ રૂપિયા આપવામાં આવશે.

તમે પ્રીમિયમ ચુકવણી કેવી રીતે કરી શકો છો?
આ યોજનામાં નોંધણી વખતે ગ્રાહક દ્વારા આપવામાં આવેલી સંમતિ મુજબ, ખાતાધારકના બેંક/પોસ્ટ ઓફિસ ખાતામાંથી રૂ. 20 ની પ્રીમિયમ રકમ ઓટો ડેબિટ સુવિધા દ્વારા એક હપ્તામાં કાપવામાં આવે છે. પ્રધાનમંત્રી સુરક્ષા વીમા યોજના જાહેર ક્ષેત્રની સામાન્ય વીમા કંપનીઓ અને અન્ય સામાન્ય વીમા કંપનીઓ દ્વારા ઓફર કરવામાં આવે છે. આ યોજના હેઠળનું કવર 1લી જૂનથી 31મી મે સુધીના એક વર્ષના સમયગાળા માટે છે.