દેશમાં કેન્દ્રીય એજન્સીઓએ ડ્રગ્સની હેરાફેરી કરનારા સામે આકરું વલણ અપનાવ્યું છે અને વિવિધ એજન્સીઓએ કરોડો રૂપિયાનું ડ્રગ્સ જપ્ત કર્યું છે. આ જ શ્રેણીમાં NCBએ હેરોઈનની હેરાફેરીનું દેશવ્યાપી નેટવર્ક ખૂલ્લું પાડતા નવ લોકોની ધરપકડ કરી હતી અને રૂ. ૫૦૦ કરોડના મૂલ્યનું ૩૫ કિલો હેરોઈન જપ્ત કર્યું છે. બીજીબાજુ કસ્ટમે યુગાન્ડાની બે મહિલા પાસેથી રૂ. ૨૮ કરોડનું કોકેઈન પકડયું છે .
નવ લોકોની ધરપકડ કરી
NCBએ શનિવારે જણાવ્યું હતું કે, તેમણે હેરોઈનની હેરાફેરીનું દેશવ્યાપી નેટવર્ક ખૂલ્લું પાડતાં નવ લોકોની ધરપકડ કરી છે અને તેમની પાસેથી ૩૫ કિલોનું હેરોઈન પકડી પાડયું છે. કેન્દ્રીય એજન્સીએ બેંગ્લુરુમાં ઝિમ્બાબ્વેથી આવેલી બે મહિલા પ્રવાસીઓને આંતરીને તેમની પાસેથી હાઈગ્રેડનું ૭ કિલો હેરોઈન પકડયું હતું.
NCBના અધિકારીઓએ વિદેશીઓની કરી ધરપકડ
તેમની પૂછપરછ કરતાં NCBના અધિકારીઓએ હેરોઈનની હેરાફેરીનું દેશવ્યાપી નેટવર્ક ચલાવનારા મુખ્ય કાવતરાંખોર એક નાઈજિરિયન અને અન્ય ઓપરેટિવ્સની દિલ્હી તથા મધ્ય પ્રદેશના ઈટારસીમાંથી ધરપકડ કરી હતી.NCBના જણાવ્યા મુજબ તપાસમાં જાણવા મળ્યું છે કે સમાન ખેપવાળી અન્ય ત્રણ મહિલા પ્રવાસી રાજધાની એક્સપ્રેસમાં બેંગ્લુરુથી દિલ્હી રવાના થઈ હતી. આ મહિલાઓ ઈટારસી ઉતરી ગઈ હતી. જોકે, ઈન્દોર ઝોનલ ટીમે ત્રણ સમાન ટ્રોલી બેગમાંથી વધુ ૨૧ કિલો હેરોઈન જપ્ત કર્યું હતું અને એક લોજમાંથી ત્રણ મહિલાઓની ધરપકડ કરી હતી.
આ ઓપરેશનમાં NCBના અધિકારીઓએ ૩૪.૮૯ કિલોનું હાઈ-ગ્રેડનું હેરોઈન જપ્ત કર્યું હતું, જેનું બજાર મૂલ્ય અંદાજે રૂ. ૫૦૦ કરોડ જેટલું થાય છે. આ ઓપરેશનમાં પકડાયેલા નવ લોકોમાંથી મુખ્ય કાવતરાંખોર નાઈજિરિયન નાગરિક હતો અને બાકીના બધા ભારતીયો હતા. વધુમાં આ ઓપરેશનમાં રૂ. ૫.૮ લાખની રોકડ પણ જપ્ત કરાઈ હતી.
યુગાન્ડાની બે મહિલાઓની ધરપકડ કરી હતી
દરમિયાન દિલ્હીમાં ઈન્દિરા ગાંધી આંતરરાષ્ટ્રીય એરપોર્ટ પર રવિવારે કસ્ટમ વિભાગે બે અલગ અલગ કેસમાં રૂ. ૨૮ કરોડના મૂલ્યના કોકેઈન સાથે યુગાન્ડાની બે મહિલાઓની ધરપકડ કરી હતી. આ બંને મહિલા રવિવારે એક જ ફ્લાઈટમાં અદિસ અબાબાથી દિલ્હી આવી હતી. તેઓ કોકેઈન ભરેલી ગોળીઓ ગળી ગઈ હતી. આ બંને પ્રવાસીઓને કસ્ટમ વિભાગે આંતર્યા હતા. પહેલા કિસ્સામાં મહિલા પ્રવાસીએ સ્વૈચ્છિક રીતે કસ્ટમ વિભાગના અધિકારીઓ સમક્ષ તેના પેટમાં કોકેઈનની ગોળીઓ હોવાનું કબૂલ્યું હતું. ત્યાર પછી તેને હોસ્પિટલ લઈ જવાઈ હતી, જ્યાં તેના પેટમાંથી ૮૧ કેપ્સ્યુલ રિકવર કરાઈ હતી. ૮૯૨ ગ્રામના આ કોકેઈનનું મૂલ્ય રૂ. ૧૩.૬ કરોડ છે.અન્ય એક કેસમાં કસ્ટમ વિભાગે એક મહિલાને આંતરી હતી અને તેના પેટમાંથી કોકેઈન ભરેલી ૮૦ કેપ્સ્યુલ રીકવર કરાઈ હતી. ૯૫૭ ગ્રામની આ કોકેઈનનું મૂલ્ય રૂ. ૧૪.૩૫ કરોડ છે. આમ, કસ્ટમ વિભાગે બે કેસમાં રૂ. ૨૭.૯૫ કરોડના મૂલ્યનું ૧.૮ કિલો કોકેઈન જપ્ત કર્યું હતું.
READ ALSO
- Shocking Video! પૈસા આપવા છતાં કપડાંના કારણે બાળકોને રેસ્ટોરન્ટમાંથી કાઢ્યા બહાર, વીડિયો જોયા પછી આવી જશે ગુસ્સો
- ભારતીય રૂપિયો ફરી તૂટ્યો, પ્રતિ યુએસ ડોલરે 78.96નું થયું ઐતિહાસિક ભંગાણ
- પતિ શાહિદ કપૂરને પોતાની તરફ ખેંચી મીરાએ કરી દીધી કિસ, વિડીયો જોઈ તમે પણ શરમાઈ જશો
- PM નરેન્દ્ર મોદી ૪થી જુલાઇએ ગુજરાતની મુલાકાતે, રાજ્યના CM ઉપરાંત કેન્દ્ર સરકારના બે મંત્રીઓ રહેશે હાજર
- વિકાસ/ ગુજરાતમાં ૩૭૬૦.૬૪ કરોડના ખર્ચે ૩૪ નેશનલ હાઇવે બનાવશે મોદી સરકાર, અમદાવાદ અને સૌરાષ્ટ્રમાં અહીં બનશે નવા ફ્લાય ઓવર