GSTV
Business India News ટોપ સ્ટોરી

મહામારીની માર/ જીડીપીમાં ૭.૩ ટકાનો ઘટાડો, 40 વર્ષમાં અર્થતંત્રને સૌથી મોટો ઝટકો

જીડીપી

ભારત સહિત સમગ્ર વિશ્વને કોરોના મહામારીએ ભરડો લેવાના કારણે નાણાકીય વર્ષ ૨૦૨૦-૨૧માં દેશના જીડીપીમાં ૭.૩ ટકાનો ઘટાડો થયો છે, જે છેલ્લા ચાર દાયકામાં જીડીપીમાં આવેલો સૌથી મોટો ઘટાડો છે. કોરોના મહામારીના કારણે છેલ્લા ચાર દાયકામાં ભારતીય અર્થતંત્રનો આ સૌથી ખરાબ દેખાવ છે. જોકે, એશિયાના ત્રીજા સૌથી મોટા અર્થતંત્રમાં ગયા નાણાકીય વર્ષના જાન્યુઆરી-માર્ચના ત્રિમાસિકમાં જીડીપી ૩૮.૯૬ લાખ કરોડ રૂપિયાનો રહ્યો, જે નાણાકીય વર્ષ ૨૦૧૯-૨૦ના ચોથા ત્રિમાસિકમાં રૂ. ૩૮.૩૩ લાખ કરોડ હતો. આમ, માર્ચ ત્રિમાસિકમાં જીડીપમાં ૧.૬ ટકાનો વધારો થયો છે, જે સંકેત આપે છે કે કોરોના મહામારીની બીજી લહેર પહેલાં દેશનું અર્થતંત્ર રિકવરીના માર્ગે આગળ વધી રહ્યું હતું.

જીડીપીમાં ૭.૩ ટકા ઘટાડો

સરકારે સોમવારે જાહેર કરેલા આંકડાઓ મુજબ નાણાકીય વર્ષ ૨૦૨૦-૨૧માં દેશનો જીડીપી વર્ષ દરમિયાન ૭.૩ ટકા ઘટયો હતો,જે દર્શાવે છે કે કોરોના મહામારીની ભારતીય અર્થતંત્ર પર કેટલી ગંભીર અસર પડી છે. ગયા વર્ષે લૉકડાઉનના કારણે દેશમાં આર્થિક પ્રવૃત્તિઓ થંભી જતાં પ્રથમ છ મહિનામાં અર્થતંત્ર સંકોચાયું હતું. વર્ષ ૧૯૭૯-૮૦માં જીડીપી સંકોચાઈને ૫.૨ ટકા રહ્યો હતો. ત્યાર પછી છેલ્લા ૪૦ વર્ષમાં સૌપ્રથમ વખત ભારતીય અર્થતંત્રમાં આખા વર્ષ દરમિયાન જીડીપીમાં ઘટાડો જોવા મળ્યો હતો. નાણાકીય વર્ષ ૨૦૧૯-૨૦ દરમિયાન દેશનું અર્થતંત્ર ચાર ટકાના દરે વૃદ્ધિ પામ્યું હતું. નાણાકીય વર્ષ ૨૦૧૭માં જીડીપીમાં ૮.૩ની વૃદ્ધિ જોવા મળી હતી જ્યારે પછીના વર્ષે એટલે કે નાણાકીય વર્ષ ૨૦૧૮માં જીડીપી ઘટીને ૭ ટકા અને નાણાકીય વર્ષ ૨૦૧૯માં ૬.૧ ટકા રહ્યો હતો.

અર્થતંત્રનું કદ ઘટીને ૧૩૫ લાખ કરોડ થયું

નેશનલ સ્ટેટિસ્ટિકલ ઓફિસ (એનએસઓ) દ્વારા સોમવારે જાહેર કરાયેલા આંકડા મુજબ નાણાકીય વર્ષ ૨૦૨૧માં ભારતીય અર્થતંત્રનું કદ ઘટીને ૧૩૫ લાખ કરોડ થયું હતું, જે માર્ચ ૨૦૨૦માં રૂ. ૧૪૫ લાખ કરોડ હતું. અર્થતંત્રે ફરી ૧૪૫ લાખ કરોડનું કદ કરવા માટે ચાલુ નાણાકીય વર્ષ ૨૦૨૧-૨૨માં અર્થતંત્રે ૧૦થી ૧૧ ટકાના દરે વિકાસ કરવો પડશે, પરંતુ દેશમાં કોરોના મહામારીની બીજી લહેરના કારણે અનેક રાજ્યોમાં લૉકડાઉન અને નિયંત્રણોને કારણે ફરીથી આર્થિક પ્રવૃત્તિઓ મંદ પડી છે. પરિણામે નીચા બેઝ છતાં ભારતીય અર્થતંત્ર માટે દ્વિ-અંકી વૃદ્ધિદર હાંસલ કરે તેવી સંભાવના ખૂબ જ ઓછી છે.

WHO

દેશમાં કોરોનાના કેસ મે મહિનાના પ્રારંભમાં દૈનિક ચાર લાખથી ઘટીને હાલ દૈનિક ૧.૫ લાખ થયા હોવા છતાં અર્થતંત્રમાં ૫૫ ટકા યોગદાન આપતી ગ્રાહક માગમાં નોંધપાત્ર ઘટાડો જોવા મળ્યો છે અને બેરોજગારીનો દર એક વર્ષમાં ૧૪.૭૩ ટકાની ટોચે પહોંચ્યો છે, જે અર્થતંત્ર માટે નવો મોટો પડકાર છે. એનએસઓએ અગાઉ નાણાકીય વર્ષ ૨૦૨૦-૨૧માં અર્થતંત્રમાં આઠ ટકાના જ્યારે આરબીઆઈએ ૭.૫ ટકાના ઘટાડાનો અંદાજ વ્યક્ત કર્યો હતો. બીજીબાજુ ચીને જાન્યુઆરી-માર્ચ ૨૦૨૧ના ત્રિમાસિકમાં ૧૮.૩ ટકાના દરે વૃદ્ધિ હાંસલ કરી છે.

ઊંચા કર સંગ્રહના કારણે નાણાકીય વર્ષ ૨૦૨૧માં રાજકોષીય ખાધ ૯.૩ ટકા સુધી સિમિત રાખવામાં મદદ મળી હતી. અગાઉ તે ૯.૫ ટકા રહેવાનો અંદાજ વ્યક્ત થયો હતો. ફેબુ્રઆરી ૨૦૨૦માં બજેટ રજૂ કરતી વખતે સરકારે તે ૩.૫ ટકા રહેવાનો અંદાજ મૂક્યો હતો. દેશમાં કોરોના મહામારી ફાટી નિકળી તે પહેલાં નબળી આવક વૃદ્ધિને કારણે ૨૦૧૯-૨૦માં રાજકોષીય ખાધ જીડીપીના ૪.૬ ટકા રહી હતી, જે સાત વર્ષની ટોચે હતી. સરકારે ચાલુ નાણાકીય વર્ષ ૨૦૨૧-૨૨માં રાજકોષીય ખાધ જીડીપીના ૬.૮ ટકા રહેવાનો અંદાજ વ્યક્ત કર્યો છે. ભારતીય અર્થતંત્રમાં એપ્રિલ-જૂન ૨૦૨૦ના ત્રિમાસિકમાં વિક્રમી ૨૪.૪ ટકા અને જુલાઈ-સપ્ટેમ્બરના ત્રિમાસિકમાં ૭.૩ ટકાનો ઘટાડો જોવા મળ્યો હતો. ઑક્ટોબર-ડિસેમ્બર ત્રિમાસિકમાં જીડીપીનો વૃદ્ધિદર ૦.૪ ટકા રહેતાં અર્થતંત્રની ગાડી ફરી પાટે ચઢી હતી. નાણાકીય વર્ષ ૨૦૨૧માં ગ્રોસ વેલ્યુ એડેડ (જીવીએ) ગ્રોથ માઈનસ ૬.૨ ટકા રહ્યો, જે માર્ચ ત્રિમાસિકમાં ૩.૭ ટકા હતો.

Read Also

Related posts

અહીં સ્થાનિક ઉમેદવારને ટિકિટ નહીં આપો તો આપ જીતી જશે, ભાજપના નેતાએ બધાની બોલતી કરી બંધ

Zainul Ansari

નીતિશ ફરી બનશે સીએમ / આરજેડી અને કોંગ્રેસને મળશે ડેપ્યુટી સીએમનું પદ, આ છે સત્તાની નવી ફોર્મ્યુંલા

Hardik Hingu

મોદી સરકારે કેન્દ્રીય કર્મચારીઓને આપ્યો મોટો ઝટકો, નહીં મળે આઠમું પગાર પંચ

GSTV Web Desk
GSTV