GSTV
Ahmedabad Trending ગુજરાત

ચાના પ્લાસ્ટીકના કપ અને પાણીના પાઉચ પર અમદાવાદમાં પ્રતિબંધ

મ્યુનિ. હેલ્થ કમિટીની આજે મળેલી બેઠકમાં ‘વિશ્વ પર્યાવરણ દિન’ના સંદર્ભમાં અમદાવાદમાં ચા-કોફીની લારીઓ પર વપરાતા પ્લાસ્ટીકના કપ, પાણીના પાઉચ અને પાન-મસાલા મસળવા તેમજ પેકીંગ માટે વપરાતા પ્લાસ્ટિકના ટુકડાઓ ઉપર પ્રતિબંધ મુકવામાં આવ્યો છે. આ બાબતે ઉત્પાદક, વિતરક અને વપરાશ કરતા એકમો અને દુકાનદારો સામે કડક પગલાં લેવાનું નક્કી થયું છે.

આ અંગે વિગતો આપતા મેયર ગૌતમ શાહે જણાવ્યું હતું કે પ્રતિબંધિત પ્લાસ્ટિકનો વપરાશ કરતા ધંધાકીય એકમો સામે ‘સીલ’ કરી દેવા સુધીના કડક પગલાં લેવાશે. લારી, ગલ્લાં, દુકાનો પર પ્લાસ્ટિક પર પ્રતિબંધ હોવાની સૂચના આપતા બોર્ડ મુકવામાં આવશે. શાકભાજી અને ફ્રુટસ માર્કેટ હોય ત્યાં ઝભલાના બદલે કાગળ કે કાપડની થેલી વાપરવા માટે સમજાવવામાં આવશે, જનજાગૃતિ કેળવવામાં આવશે. પ્લાસ્ટિક બોટલસનો કચરો ઉઘરાવવા વેનડીંગ મશીનો મુકાશે જે ૧૬ થી ૫૦ પૈસા સુધીનું કેશ બેક કે ડિસ્કાઉન્ટ કુપન ભેટ આપશે. ઉપરાંત પાતળા પ્લાસ્ટિકનો રિયુઝ કે રિસાયકલ થતા ના હોવાથી લોકો તેને ફેંકી દે છે, જે ગટર પર ચોટી જતાં ચોમાસામાં પાણી ભરાય છે. આવી થેલીઓમાં ભરીને ફેંકાયેલો રસોડાનો કચરો ખાવાથી ગાય-ભેંસ જેવા પ્રાણીઓ બિમાર પડે છે. તેમજ મ્યુનિ. દ્વારા ‘માગ પ્રમાણે વૃક્ષના છોડ’ની મોબાઇલ એપ વિકસાવવામાં આવશે.

૧૫ જેટલા પ્લોટોમાં અર્બન જંગલની જેમ વૃક્ષો ઉછેરવાનું નક્કી થયું

તા. ૫મી પછી સારો વરસાદ પડયા બાદ જ્યાંથી ડિમાન્ડ આવી હશે ત્યાં જઇને મ્યુનિ.નો સ્ટાફ તેમના પસંદગીના વૃક્ષો વાવશે. બીઆરટીએસના બસ સ્ટેન્ડ પર વર્ટિકલ ગાર્ડન બનાવાશે. મેટ્રોના રૃટમાં વધુમાં વધુ વૃક્ષ ઉછેરવામાં આવશે. ૧૫ જેટલા પ્લોટોમાં અર્બન જંગલની જેમ વૃક્ષો ઉછેરવાનું નક્કી થયું છે. આજે વિશ્વ પર્યાવરણ દિવસે મુકેલી યોજનાઓ કેટલી સફળ થાય છે, તે જોવાનું રહે છે. બાકી મ્યુનિ. દ્વારા વિકાસના નામે મોટા પ્રમાણમાં લીલાછમ વૃક્ષોનું નિકંદન કઢાય છે, નદી જેવા જળસ્ત્રોતોમાં મોટા પ્રમાણમાં ટ્રીટ કર્યા વગરનું ગંદુ પાણી છોડાય છે, તળાવોમાં વરસાદી પાણીના બદલે ગટરનું પાણી ભરાય છે, પર્કોલેટીંગ વેલની કયાંય સફાઇ કે જાળવણી થતી નથી.

આ મુદ્દાઓનો જ અસરકારક ઉપાય શોધાય તો પણ પર્યાવરણની જાળવણીની દિશામાં મોટી સેવા કરી ગણાશે. બીજી તરફ ૪૦ માઇક્રોનથી પાતળા પ્લાસ્ટિક ઉપર તો ૨૦૧૧-૧૨ થી પ્રતિબંધ છે જ પણ હેલ્થ ખાતું સક્રિય નહોતું તેમ કહી શકાય. ઝુંબેશ ચલાવે, સીલ મારે અને પછી હપ્તાનો ઇન્ડેક્ષ ઉંચો જતા બંધ થઈ જાય તે રમત દર વર્ષે ચાલે છે. ઉત્પાદન કેન્દ્રો, જીઆઈડીસીમાં આવેલા મોટા એકમો સામે પગલાં લેવાના બદલે શાકભાજીની લારી અને પાનના ગલ્લે જ કેમ પગલાં લેવાય છે, તે પ્રશ્ન છે.

કચરાની ગાડી માટે વધુ ૧૮ લાખના સ્ટીકર્સ લગાવાશે

મ્યુનિ. હેલ્થ કમિટીએ રૃ. ૧૮.૦૪ લાખના ખર્ચે જીપીએસ સિસ્ટમના વાહનોને ક્યાં ઉભા રહેવું તે દર્શાવતા ૨૨૦૦૦ સ્ટીકર્સ લગાડવાનો નિર્ણય લીધો છે. આ અંગે વિગતો આપતા કમિટીના ચેરમેને જણાવ્યું હતું કે, આ ખર્ચ જે-તે વિસ્તારના કોન્ટ્રાકટરો કરશે એટલે મ્યુનિ.એ આ ખર્ચ કરવાનો રહેશે નહિ. જુદા જુદા સ્થળોએ અલગ અલગ સાઇઝના અને જાડાઇના સ્ટીકર જરૃરિયાત પ્રમાણે લગાડવામાં આવશે.

 

Related posts

શેર બજારમાં ફૂલ ગુબાબી તેજી / સેન્સેક્સ આજે ફરી ઐતિહાસિક ટોચે, આ શેરોમાં જોવા મળી તેજી

Hardik Hingu

ઓછો અને અપૂરતો ખોરાક નહિ ચાલે/ શરીરને આરોગ્યપ્રદ અને તંદુરસ્ત રાખવા પૂરતો આહાર જરૂરી, ઓવર કે અન્ડર ઈટિંગ આપે છે તકલીફોને આમંત્રણ

Akib Chhipa

હવે ફેસ સ્કેન વિના એરપોર્ટ પર એન્ટ્રી નહીં થાય, જ્યોતિરાદિત્ય સિંધિયાએ શરૂ કરી ‘ડીજીયાત્રા’ સુવિધા

Siddhi Sheth
GSTV