GSTV

9/11 ટાઈમલાઈન : વર્લ્ડ ટ્રેડ સેન્ટર પરના આતંકી હુમલા વખતે શું થયું હતું? મિનિટે મિનિટની વિગતો..

વર્લ્ડ ટ્રેડ સેન્ટર

Last Updated on September 10, 2021 by Lalit Khambhayata

અમેરિકા પર થયેલા આતંકી હુમલાના 20 વર્ષ, લેખ-2

2001ની 11મી સપ્ટેમ્બરે અમેરિકાના જ વિવિધ ચાર વિમાનો હાઈજેકરોએ હાઈજેક કર્યા. સવારના 8-46થી લઈને 10-02 સુધીમાં વિવિધ ત્રણ વિમાન ત્રણ સ્થળે અથડાવી દીધા. ચોથું વિમાન ખેતરમા ટૂટી પડયું. એ પછી તુરંત સમગ્ર અમેરિકામાં ઉડતાં તમામ વિમાનોને જમીન પર ઉતારી દેવાયા હતા. અમેરિકી એર સ્પેસમાં બહારથી કોઈ વિમાન ન આવે તેની પણ તકેદારી રખાઈ. દરમિયાન એક પછી એક કરીને વર્લ્ડ ટ્રેડ સેન્ટરના બન્ને ટાવરો પણ ધરાશયી થયા. સ્થિતિ વધુ બગડે તો પહોંચી વળવા માટે આખા જગતમા અમેરિકાના લશ્કરી દળો જ્યાં પણ હોય ત્યાં તેમને એલર્ટ કરી દેવાયા. એ દિવસનો મિનિટ ટુ મિનિટ ઘટનાક્રમ

7-59- બોસ્ટનથી લોસ એન્જેલસ જવા અમેરિકી એરલાઈન્સની ફ્લાઈટ 11 રવાના થઈ. તેમાં 92 મુસાફર સવાર હતા.
8-14- યુનાઈટેડ એરલાઈન્સની ફ્લાઈટ નંબર 175 પણ બોસ્ટનથી લોસ એન્જેલસ જવા રવાના થઈ. તેમાં 65 મુસાફર હતા.
8-19 – ફ્લાઈટ 11ની એટેન્ડન્ટે ગ્રાઉન્ડ સ્ટાફને જાણ કરી કે વિમાન હાઈજેક થયું છે. એટલે એરલાઈન કંપનીએ તુરંત એફબીઆઈને જાણ કરી.
8-20 – વોશિંગ્ટનથી 64 મુસાફરો સાથેનું અમેરિકી એરલાઈન્સનું વિમાન ફ્લાઈટ નંબર 93 લોસ એન્જેલસ જવા રવાના થયું.
8-25 – ફ્લાઈટમાં રહેલા આતંકી મોહમદ અટ્ટાએ ગ્રાઉન્ડ કન્ટ્રોલને માહિતી આપી કે અમારી પાસે એકથી વધારે વિમાનો છે.
8-37 – અમેરિકાના એર ડિફેન્સ વિભાગને જાણ કરવામાં આવી કે વિમાનો હાઈજેક થયા છે.
8-41 – યુનાઈટેડ એરલાઈન્સનું વિમાન નેવાર્કથી સાન ફ્રાન્સિસ્કો જવા રવાના થયું.
8-46 – અમેરિકી એરલાઈન્સની ફ્લાઈટ નંબર 11 વર્લ્ડ ટ્રેડ સેન્ટરના નોર્થ ટાવર સાથે અથડાયું. એ દિવસની એ પહેલી દુર્ઘટના હતી. વિમાનમાં શામેલ તમામ મુસાફરો તુરંત માર્યા ગયા અને ટાવરમાં આગ લાગી.
8-47 – ન્યૂયોર્કની પોલીસ  અને ફાયર ડિપાર્ટમેન્ટના કર્મચારીઓ વર્લ્ડ ટ્રેડ સેન્ટર પહોંચ્યા.

8-53 – ગુમ થયેલા વિમાન ફ્લાઈટ-11ને શોધવા માટે અમેરિકી વાયુસેનાના ફાઈટર વિમાનો રવાના થયા.
9-03 – યુનાઈટેડ એરલાઈન્સની ફ્લાઈટ નંબર 175 સાઉથ ટાવર સાથે અથડાઈ. વિમાન 77 અને 85મા માળ વચ્ચે અથડાયું હતું. તેનો વિડીયો ઉતરી શક્યો કેમ કે એ વખતે એ વિસ્તારમાં ન્યૂઝ કેમેરામેન હાજર હતો. તેણે ઊચે કેમેરો કરી શૂટિંગ ઉતારી લીધું જે યાદગાર સાબિત થયું.
9-04 – એ વખતે જ અમેરિકી ઉપ પ્રમુખ ડીક ચેની સમજી ગયા કે આ તો આતંકી હુમલો છે. તેમણે તુરંત સંરક્ષણ અને સુરક્ષા વિભાગને એલર્ટ કર્યા.
9-05 – અમેરિકી પ્રમુખ બુશ ત્યારે ફ્લોરિડાની પ્રાથમિક શાળામાં એક કાર્યક્રમમાં આવ્યા હતા. ત્યાં તેના સલાહકારે આવીને દુર્ઘટનાની માહિતી આપી.
9-10 – ટાવરમાં ફસાયેલા નાગરિકોએ બચવા માટે જ્યાં જગ્યા મળે ત્યાંથી જમ્પ મારવાની શરૃઆત કરી.
9-30 – બુશે જાહેર કર્યું કે દેશ પર આતંકી હુમલો થયો લાગે છે.
9-37 – વોશિંગ્ટનમાં આવેલા અમેરિકી લશ્કરી મથક પેન્ટાગોન સાથે એક વિમાન અથડાયું. વિમાનમાં સવાલ 59 મુસાફરો અને પેન્ટાગોનમા રહેલા સવાસો કર્મચારી મૃત્યુ પામ્યા.
9-44 – વ્હાઈટ હાઉસ અને અમેરિકી સંસદ ભવન ખાલી કરી દેવાયા.
9-45 – બુશે ઉપ પ્રમુખ ચેનીને કહ્યું, આપણે જંગ લડવાનો છે, કોઈએ તો એના આકરા પરિણામો ભોગવવા પડશે.

9-50 – અમેરિકાના તમામ એરપોર્ટ શટડાઉન કરી દેવાયા.
9-55 – બુશ ફ્લોરિડાથી વોશિંગ્ટન આવવા રાવાના થયા પણ રૃટ બદલાવી નાખ્યો.
9-57 – ફ્લાઈટ 93માં રહેલા મુસાફરોને મોબાઈલ દ્વારા જાણ મળી કે અન્ય વિમાનો હાઈજેક થયા છે. એવા હાઈજેકરો પોતાના વિમાનમાં હોવાની જાણ થતાં મુસાફરોએ હાઈજેકરો પર હુમલો કર્યો. એ વિમાન થોડી વાર પછી જમીન પર ક્રેશ થયું. 40 મુસાફરો માર્યા ગયા.
9-59 – સાઉથ ટાવર ધરાશયી થયું.
10-15 – પેન્ટાગોન ઓફિસ ખાલી કરવાનો આદેશ અપાયો. 
10-20 – જો કોઈ વિમાન ફ્લાઈટ કન્ટ્રોલને જવાબ ન આપે તો તેને ત્યાં જ શૂટ કરવાનો પ્રમુખ બુશે એરફોર્સને આદેશ આપ્યો.
10-28 – વિમાન અથડાયાની 102 મિનિટ પછી નોર્થ ટાવર પણ કાટમાળમાં ફેરવાયું, પડી ગયું.
13-44 – અમેરિકાના પૂર્વ કાંઠે કોઈ શંકાસ્પદ વિમાન દેખાય તો તપાસ કરવા માટે ત્યાં રહેલા યુદ્ધજહાજોને એક્ટિવ કરાયા.
20-30 – બુશે ટીવી પર દેશને સંબોધન કર્યું. કહ્યું કે આતંકીઓને છોડાશે નહીં. દેશને હૈયાધારણા આપી. ભવિષ્યમાં આવો કોઈ હુમલો નહીં થાય એવી ખાતરી પણ આપી. ત્યાં સુધીમાં વિગતો મળી ચૂકી હતી કે હુમલાનો સંચાલક ઓસામા છે.

13 સપ્ટેમ્બર – બંધ કરી દેવાયેલી અમેરિકી એર સ્પેસ ફરીથી ખોલી દેવાઈ. આખા જગતના એરપોર્ટની સુરક્ષા વધારાઈ. મુસાફરોનો વેઈટિંગ સમય વધી ગયો.

20 સપ્ટેમ્બર – જ્યોર્જ બુશે વોર ઓન ટેરરની જાહેરાત કરી. બુશે કહ્યુ કે વોર ઓન ટેરરની શરૃઆત અલ કાયદાના ખાત્માથી થશે, પરંતુ એ જંગ ત્યાંથી અટકશે નહીં.

ઓક્ટોબર 2001 – આતંકીઓને ઠેકાણે પાડવા 7મી ઓક્ટોબરે અમેરિકાએ ઓપરેશન એન્ડ્યુરિંગ ફ્રિડમ લોન્ચ કર્યું. એ ઓપરેશનમાં સૌથી પહેલું કામ અલ કાયદા અને તાલિબાનના અફઘાનિસ્તાનમાં આવેલા મથકો પર આકાશી હુમલા કરવાનું થયું. અફઘાનિસ્તાન ઉપરાંત સોમાલિયા, કિર્ગિઝસ્તાન, ફિલિપાઈન્સ વગેરે દેશોમાં પણ આતંકીઓને પકડાયા કે ઠાર કરાયા. અફઘાનિસ્તાનમાં સફળતા મળી અને 1996થી સત્તા પર બેઠેલા તાલિબાનોને પાછા તેમની ગુફા ભેગા કરી દીધા. બીજા વર્ષે અફઘાનિસ્તાનમાં નવી સરકરા રચવાની શરૃઆત કરી. અફઘાનિસ્તાનને ફરી બેઠું કરવા અમેરિકી સંસદે 38 અબજ ડોલરનું બજેટ મંજૂર કર્યું.

નવેમ્બર 2002 – દેશની આંતરીક સુરક્ષા માટે અમેરિકી સરકારે નવો વિભાગ ઉભો કર્યો. તેને હોમલેન્ડ સિક્યુરિટી નામ આપવામાં આવ્યું. લોકોની સુરક્ષાની જવાબદારી આ વિભાગને સોંપાઈ. એ વિભાગમાં જોત જોતામાં અઢી લાખ કર્મચારીઓની ભરતી થઈ અને અમેરિકાનો એ ત્રીજા નંબરનો સૌથી મોટો ડિપાર્ટમેન્ટ બન્યો.

એપ્રિલ 2003 – ટ્રેડ સેન્ટર પડી ગયા ત્યાં મેમોરિયલ બનાવવાનું નક્કી થયું. એ માટે ડિઝાઈન સ્પર્ધા લોન્ચ કરાઈ. થોડા મહિનાઓ પછી ડિઝાઈન વગેરે ફાઈનલ કરી સ્મારકની કામગીરી શરૃ કરાઈ.

જુલાઈ 2004 – 9-11 માટે ખાસ નિમાયેલા કમિશને રિપોર્ટ આપ્યો. એ મુજબ 19 વ્યક્તિઓ હતા હાઈજેકિંગ કરનારા. બધા અલ કાયદાના સભ્યો હતા.

2009 – બુશકાળથી અફઘાનિસ્તાનમાં સૈનિકો મોકલવાની શરૃઆત થઈ. શરૃઆતમાં હજાર, પછી દસ હજાર. સંખ્યા 2009માં વધતી વધતી 1 લાખ સુધી પહોંચી. ઓબામાકાળમાં અફઘાનિસ્તાનમાં અમેરિકાના સૌથી વધારે સૈનિકો તૈનાત હતા. માટે અફઘાન યુદ્ધ અમેરિકી ઈતિહાસનું સૌથી મોટું અને પછી સૌથી લાંબુ બન્યું.

જાન્યુઆરી 2011 – હુમલાને કારણે લોકોના આરોગ્ય પર વિપરિત અસર થઈ હતી. હુમલા વખતે શ્વાસ લેવામાં પ્રોબ્લેમ હતા. એ બધાને વળતર માટે આરોગ્યનો નવો કાનૂન ઓબામાએ લાગુ કર્યો.

મે 2011 – 2જી તારીખે પાકિસ્તાનમાં ઘૂસીને અમેરિકી સૈન્ય ટુકડીએ લાદેનને ખતમ કર્યો. એ સાથે અમેરિકી ઈતિહાસનું સૌથી મોટું મેનહન્ટ ઓપરેશન પુરું થયું.

જૂન 2011 – ઓબામાએ જાહેરાત કરી કે હવે ધીમે ધીમે અફઘાનિસ્તાનમાંથી અમેરિકી સૈન્ય પાછુ ખેંચી લેવાશે. એ વખતે તો એવુ આયોજન હતું કે ડિસેમ્બર 2011 સુધીમાં જ અમેરિકી સૈન્ય પાછુ ખેંચી લેવાશે. એ પણ એ સમય આવતા બીજા દસ વર્ષ લાગ્યા.

સપ્ટેમ્બર 2011 – હુમલાના દસ વર્ષ પછી મેમોરિયલ ખુલ્લું મુકાયું.

મે 2014 – ન્યૂયોર્કના મેનહટ્ટન વિસ્તારમાં નેશનલ સપ્ટેમ્બર 11 મેમોરિયલ અને મ્યુઝિયમ ખુલ્લું મુકાયુ.

2017 – ઓબામાએ સૈન્ય પાછુ ખેંચવાની શરૃઆત કરી હતી. અફઘાન સરકાર સાથે એ માટે વિવિધ કરારો પણ થયા હતા. પણ ટ્રમ્પ સત્તામાં આવ્યા પછી ફરી સૈન્ય સંખ્યા વધારી. 3000 નવા સૈનિકો મોકલ્યા એટલે અફઘાનિસ્તાનમાં અમેરિકી સૈનિકોની સંખ્યા વધીને 14 હજાર થઇ.

જાન્યુઆરી 2019 – અમેરિકાએ તાલિબાનો સાથે સંધિ કરી. આજે વાત માનવા જેવી ન લાગે પણ ખરેખર સંધિ કરી અને ભારત જેવા દેશોને વચ્ચે પણ રાખ્યા. એ સંધિ મુજબ અમેરિકી સૈન્ય ખસી જાય પછી તાલિબાનો શાંતિ જાળવશે એવી વાત હતી. એમાં વળી અમેરિકાએ ડહાપણ વાપરીને અફઘાનિસ્તાન સરકારને શામેલ કરી ન હતી. એટલે અમેરિકાએ જેવો પગ હટાવ્યો એ સાથે તાલિબાનોને ફાવતું મળ્યું.

2021 – ટ્રમ્પે સૈન્ય પાછુ ખેંચવાનું ચાલુ કર્યું. બાઈડેન સત્તા પર આવ્યા તેમણે પણ સૈનિકો ઓછાં કરવાનું ચાલુ રાખ્યું. 31મી ઓગસ્ટ છેલ્લી તારીખ હોવાનું બાઈડેને જાહેર કર્યું. એ જાહેરાત જુલાઈમાં થઈ એ સાથે જ તાલિબાનો સક્રિય થયા. ગુફાઓમા છૂપાયેલા હતા ત્યાંથી મેદાનમાં આવ્યા અને ખાલી પડેલા અફઘાનિસ્તાનને ખેદાન-મેદાન કરવાની શરૃઆત કરી.

Related posts

છેલ્લાં કેટલાંય વર્ષોથી ગ્રંથપાલની ભરતી ન થતા ડિગ્રીધારકોની સ્થિતિ કફોડી, વારંવાર રજૂઆત કરતા બેરોજગારો અકળાયાં

Dhruv Brahmbhatt

IND vs PAK: વિરાટ કોહલીની કેપ્ટન્સીથી લઇને ઓપનરોનો ફ્લોપ શૉ, આ છે ટીમ ઇન્ડિયાની કારમી હારના 5 મોટા કારણો

Bansari

દિલ્હી હાઇકોર્ટનો મહત્ત્વપૂર્ણ ચૂકાદો/ કર્મચારીને ગેરકાયદે બરતરફ કરવા બદલ એઇમ્સને રૂ. 50 લાખ ચૂકવવા આદેશ

Bansari
Do NOT follow this link or you will be banned from the site!